uMthunywa
Thokozile Mbedzi
KULOSIPHATHELENI weBeitbridge ohlaselwe ngoguluva abathathu akade behlome ngemibhobho bamtshontshela imota, imali engange-R567 000 kanye labomakhalekhukhwini ngeviki ephelileyo, uMthunywa ukuzwile lokhu.
Usiphatheleni lo okungasatholakalanga igama lakhe, kubikwa uhlaselwe yizigelekeqe lezi ngesikhathi engena endlini yakhe evela eWest Nicholson.
Kubikwa imota kasiphatheleni lo ibiza imali engangeUS$4 500.
Omunye usiphatheleni weBeitbridge oxoxisane loMthunywa othande ukwaziwa ngokuthi nguNkosiyabo nje kuphela uthe kalankani ngemali etshontshelwe omunye wabo.
“Umama lo kukhanya uhlaselwe endlini yakhe evela thatha ezinye imali zakhe eWest Nicholson. Kukhanya uhle wathi engena egumeni lakhe kwaqhamuka amadoda amathathu elemibhobho ahle amthathela imali omakhalekhukwini lemota abaleka ngayo.
“Sesihlezi sisevalweni lapha ngoba bakhona asebesithi bangaba kwazi ukuthi ulemali bayakudingela abantu bazokuhlasela. Inengi lalabo bantu bazenza engani sisebenza sonke kanti vele bona bayabe belenjongo zabo zokusikhuthuza,” kuveza uNkosiyabo.
Isikhulumi samapholisa uAssistant Commissioner Paul Nyathi ebuzwa ngodaba lolu uthe solufikile ewofisini yabo njalo basaphenyisisa kabanzi ngalo.
“Udaba lukasiphatheleni ohlaselwe yizigelekeqe ezintathu ebezihlomile emzini wakhe solufikile ewofisini yethu ngakho sisaphenyisisa kabanzi ngodaba lolu ngoba sifuna ukubakwazi ukuthi imali engaka ubevele eyithethe ngaphi.
“Ibizo lakhe sisaligodlile ngoba sisamvikela ukuze siphenyisise size siqede. Oguluva bathethe imali engangeR567 000, omakhalekhukwini lemota ebiza iUS$4 500 babaleka layo,” kuchasisa uAsst Comm Nyathi.
“Sithanda ukuphinda njalo ukukhuthaza uzulu ukuthi ngaso sonke isikhathi ukuthi ahambise imali emabhanga ngoba kuyingozi ukuhamba ethwele inkalakatha zemali njengalokhu okwenzakale kumama lo.
“Siyacela uzulu ongaba lolwazi olungasinceda ukuba sibophe izigelekeqe lezi azise amapholisa aseduzane laye,” kuphetha uAsst Commissiner Nyathi.
