uMthunywa
YiNtatheli kaMthunywa
KULENDODA yePenduka Mine eChiundura engutsheketsha evele phambi komthethwandaba weKwekwe ikhangelane lecala lokubeka omunye asebenza laye engozini ngokumbhula ngogodo ekhanda ngoba emncitshe isitshwala.
Umsolwa u-Asin Chireya oleminyaka yokuzalwa engamatshumi amabili lantathu uvele phambi kukamantshi uNkosazana Florence Nago lapho okuvezwe khona ukuba wasebenzisa ugodo olungaba lukhulu kulomphini wekhuba ngesikhathi etshaya uDoubt Moyo (28) ongumngane wakhe ekhanda ngoba uMoyo wayeziphekele isitshwala wamncitsha.
Ebuzwa ukuba ukwenzeleni lokhu emthethwandaba umsolwa uthe wacatshulwa yikuthi umamangala wapheka isitshwala yena wangambali.
“Ngacela isitshwala njengensukwini, uDoubt wangitshela ukuba uziphekele yena yedwa lapho engiphendula ngimbuza ethi akula sitshwala njalo akula ozapheka futhi,” kulandisa uChireya.
Uqhubekele phambili echaza ukuba impendulo kaMoyo yiyo eyamcaphulayo waze wadobha ugodo olwaluseduze watshaya uMoyo ekhanda.
Umantshi uNkszn Nago ubike phambi komthethwandaba ukuba incazelo kaChireya kayimuphi mvumo yokwenza lokhu akwenzileyo.
“Incazelo yakho Chireya kayisuthisi ngoba ubungela mvumo yokutshaya uMoyo iloba lokho kwenzakele.”
Umsolwa ugwetshwe inyanga ezimbili esejele.
