uMthunywa
YiNtatheli kaMthunywa
UMAQHUZU weHighlanders uNdumiso Gumede kasoke abambelele esihlalweni kokuphela nanko phela useveze ukuba uzatshiya umsebenzi ekupheleni kwalinyanga.
UGumede utshele umbuthano wombukiso wamapikitsha eBosso ngeviki ephelileyo ukuthi usezatshiyela inkokheli ezisacathula lumsebenzi wokukhokhela inhlelo zemahofisini eqembu.
Umbukiso lo ubuyingxenye yemicimbi yokuthakazelela iminyaka engamatshumi ayisitshiya galolunye yokusungulwa kweHighlanders.
Ukusuka kukaGumede bekusaziwa ngoba isivumelwano somsebenzi wakhe kwezikaMagebhula siphela mhlaka 31 kuyonale inyanga, okutsho ukuba ekuqaleni komnyaka ozayo kuyabe kungasela maqhuzu ohola ithimu le.
Uphuma nje kubukhokheli emiswe ukusebenza yinhlanganiso yeZifa kulandela isimemezelo salinhlanganiso yenguqu esithi uGumede wephula imithetho yenguqu ethile.
Ekhuluma lomphakathi obuthe gwaqa eNational Art Gallery enzikini yakoBulawayo, uGumede kazange akufihle ukuthi usetshiya umsebenzi.
“Kumaviki amabili alandelayo ngizabe sengingasekho ehofisini,” nguGumede lo.
Inkokheli yenguqu le ithe izizwa ithabile ukuthi itshiya ihofisi ngesikhathi iBosso ithakazelele iminyaka engamatshumi ayisitshiya galolunye.
Kulandela ukuveza lokhu, izikhulumi labasekeli beqembu abakhulume loMthunywa babike ngokudabuka inhliziyo ukuthi ukusuka kukaGumede kuzatshiya isikhala eqenjini.
“UGumede ngumaqhuzu oqotho. Siyambonga ngomsebenzi awenzileyo lokusitshiya silolwazi olujulileyo ngezokukhokhelwa kwenguqu,” kutsho uSimanga Mthombeni olilunga leBosso ngokugcweleyo.
Ebuzwa ukuthi yini ayikhumbula kakhulu kumasizini adluleyo, uGumede uthe yikunqoba iDynamos kabili kulumnyaka.
“Kanti kwakuzaphela nini ukuhlala sikhala ngokuthi iDynamos iyasinqoba? Ngakutsho ukuthi sekwanele. Ukunqoba ithimu le kwangijabulisa kakhulu.
“Abasekeli bethu abakhuze ithimu ngedlabuzane imihla yonke,” nguGumede lo.
UGumede uphethe ngokuxwayiswa abasekeli bethimu yezwe lonke ukuthi bahlale besazi ukuba ukunqoba ithimu eyodwa akutsho ukuthi umkhankaso wenkezo enkulu yeligi usuphelile.
Kusenjalo, iphephandaba likazulu lizwe ukuthi ibhodi yeHighlanders isiqalisile ukudinga labo abangaqhatshwa kumsebenzi wokuba ngumaqhuzu weqembu.
Umgcinisihlalo webhodi uMgcini Nkolomi uthe amalunga abo azahlala phansi alungisise udaba lolu.
“Saqalisa kudala ukudinga lo ozangenela umsebenzi obubanjwe ngubaba uGumede.”
