uMthunywa
Fungai Muderere
UZIZWA equnjwaqunjwa yinjabulo umfana welokitshini lePumula uZimiseleni Moyo kulandela ukuthola isithupha sokuqeqetsha esebanga leCAF B International Diploma.
UMoyo osehlala eZambia lapho ayedlala ibhola khona, ungene ekhasini lakhe leFacebook ebika ngokuphumelela kwakhe.
Uthe konke kwenzeke ngokusebenza nzima.
“Bekunzima, ngisehluleka ukulala okwenyanga ezimbalwa. Ngithanda ukubonga uNkulunkulu ngokungiphakamisa,” kutsho uMoyo.
“Ngabe nje uNkulunkulu wanika umama ongizalayo iminyaka embalwa yokuphila ngabe wangibona ngikhula njalo ngithuthuka. Wangisiza kakhulu ngithatha inyathelo lakuqala lokuqeqetsha.”
UMoyo ngomunye wabaqeqetshi bakuleli abaqhubeka ngokuthola izithupha ezitshiyeneyo kwamanye amazwe.
Ngesikhathi zakhe engumdlali, uMoyo watshibilikela iRailstars, Motor Action leTsholotsho FC. Esechaphele eZambia wazakhela udumo edlalela iZesco United leZanaco. Ithalenta lakhe lokuqeqetsha labonakala kuqembu leMMC Galaxy Football Academy, elihlose ukungena kuligi ephakemeyo eZambia ngo2025.
Kusenjalo, umqeqetshi weqembu lamaMighty Warriors uShadreck Mlauzi, Try Ncube loBongani Mafu balubhekise eTanzania belande izifundo zeCaf A.
Bekhuluma lentatheli yeZimpapers Sports Hub uMlauzi loNcube bathe bazathapha ulwazi oluzaphathisa kakhulu kunguqu yakuleli. Omunye umqeqetshi owathola izifundo eTanzania nguThulani Sibanda osanda kuxotshwa kuqembu leTriangle United.
