uMthunywa
USELE lezigqoko abezigqokile kuphela umculi wokholo ngesikhathi kusitsha kuqhunqa indlu yakhe ekuseni ngoLwesine olwedlule. USphumelele Mbambo owaduma kuJoyous Celebration ubeseqoqe zonke impahla zakhe waya lazo kibo KwaNgcolosi njengoba ebelungiselela imicimbi eminengi amenywe kuyo ngoMpalakazi.
Umbheda layo yonke impahla yendlini ebiphakathi kutshe kwaba ngumlotha.
Ngesikhathi kusitsha indlu le bekulendodakazi yakhe kuphela ekhaya ephume ngesomvundla yayabikela omakhelwane.
USphumelele uthe kunengi okwenzeka empilweni yakhe okumtshiya lemibuzo eminengi, angazitholi lezimpendulo.
Uthe kuyatshaqisa ukuthi kutshe indlu yakhe kuphela futhi elazo zonke impahla zakhe njalo lendlela okutshe ngayo.
“Bengingekho ngiseRichards Bay lomama kwathi sesibuya ekuseni ngafonelwa kuthiwa kuyatsha. Zonke impahla zami bengizibeke ekhaya njengoba ngicula.
“Asazi kwenzakaleni angifuni ukuthi abantu kodwa uNkulunkulu kuphela owaziyo lobonayo,” kutsho uSphumelele.
Eqhuba ubalise ngosizi abhekene lalo empilweni waveza ukuthi semanengi amashwa alokhu emvelela.
“Angifuni ukukhuluma kakhulu kodwa ngizaqhubeka ngithandaza ngoba kunengi esengidlule kukho.
“Uma kufanele kujabule abantu ngezinkinga zami kulungile. Angiyazi le nto ukuthi ifike kanjani emaphepheni kodwa bengingathandi ukuthi ngilokhu ngidabukisa ngibikela bonke abantu ngosizi lwami,” kubalisa uSphumelele.
Phakathi kwezimpahla ezitshe qhu bekulezembatho zakhe zesonto kanye lokunye ahlabekisa ngakho nxa esiyacula emicimbini emikhulu.
Uthe kuyona leyondlu etshileyo bekulempahla zikanina lezendodakazi yakhe.
“Ngiyageza njengoba sikhuluma nje ngiyocotshela umama amaphinifa ngoba lezimpahla zakhe bezihlala endlini yami njengoba isikhathi esinengi bengingasahlali ekhaya,” kutsho yena.
Uma ukhuluma laye awukungabazi ukuthi uhlukumezekile emoyeni kodwa uyazama ukwenza sengathi akonakele lutho.
Ephetha uSphumelele uthe akathandi ukuvumela inhliziyo elokhu ekhala phambi kwabantu, kulalokho usethathe isinqumo sokuthi akhulekele izinkinga zakhe.
Le ntokazi kuke kwaba lemibiko eminengi ngayo kulo umnyaka okubalwa kuyo ukunyamalala kwathiwa ayaziwa itshonephi. Kwakuthiwe ugcine ukubonakala engena ehlathini ethi uyothandaza. — Ubulembu
