uMthunywa
Cornelius Luphahla
IDLELA egilweni intombazana yenkomponi yeSt Luke’s eLupane ngemva kokuba usotshukela wayo eyithole incinda uluju lwemvelo lenye indoda ngemuva kwebhawa okudale ukuthi alale ephethe ihloka efuna ukuyigamula.
Indaba le kubikwa yenzakale emavikini amabili adluleyo lapho uMnumzana Japheth Tshuma (54) athola khona umkakhe uNkosazana Silindeni Sibanda (18) encinda uluju lwemvelo loMnumzana Kholwani Ncube ngemva kwebhawa yakoKhonapho Khonapho okudale ukuthi alale ephethe ihloka efuna ukumgamula.
UMthunywa ukhulumisane loMnumzana Dennis Nkala owayekhona mhla uTshuma ethola umkakhe loNcube wathi yena wabona uTshuma esethwele ihloka ethi uthole umkakhe loNcube ngakho ufuna ukubagamula bonke.
“Mina ngathi ngizihlalele ebhawa ngabona uTshuma ethutsha ethwele ihloka ethi ulandela umkakhe ngoba umthole esotha umlilo wemvelo loNcube ngakho ufuna ukubagamula. Kuthe kunjalo ngamxwayisa ukuthi angakwenzi lokhu yena wayala.
“Ngemva kwalokho ngezwa kuthiwa balwile lomkakhe wamtshaya ngakho uselala ethwele ihloka ethi ufuna ukumgamula okudale ukuthi umkakhe amale. Ngikhuluma nje khathesi uhlala yedwa umkakhe uthi kasamfuni,” kutsho uMnu Nkala.
Ekhuluma lentatheli uMnu Tshuma uthe yena kazange wafuna ukugamula umkakhe, wavuma ukuthi wamthola elele lenye indoda egangeni ethi kodwa usamthanda njalo ufuna bahlale bonke.
“Kuliqiniso sibili ukuthi ngathola umkami elele lenye indoda egangeni elingemuva kwebhawa kodwa kangizange ngafuna ukumgamula. Umkami nguye owathi sengimbuza wahle wangitshingela khathesi usehlala yedwa kodwa uhlala endlini yami engazakhela yona.
“Okungizwisa ubuhlungu yikuthi uthi yena ulelungelo lokulala lamadoda amanengi noma eyendile, kangikwazi ukuthi ukuthatha ngaphi lokhu. Ngikhuluma nje kathesi usephila ngokuthengisa umzimba ebhawa khonapho mina ngikhona njalo elomntwana omncane,” kutsho uMnu Tshuma.
Ebuzwa ngale indaba uNkszn Sibanda uthe indaba le ingamanga njalo yena kasamfuni uTshuma ngoba ulala emthwalele ihloka njalo uyamyangisa.
“Ngamanga ukuthi uTshuma wangithola ngilele leyinye indoda kodwa kangisamfuni ngoba ulala engithwalele ihloka njalo uyangiyangisa ngoba umdala kakhulu kulami futhi kangisuthisi endlini,” kuphetha uNkszn Sibanda.
