uMthunywa
YiNtatheli kaMthunywa
ATHWELE amagabha avuzayo amadoda akhele esigabeni seShirville eNyamandlovu ngosobhuku wakule indawo okubikwa ukuthi uyazithaphuzela omkabo, uMthunywa ukuzwile lokhu.
Kubikwa usobhuku lo wabhujelwa ngumkakhe kuminyaka embalwa edluleyo.
Esinye isakhamuzi sakule indawo esingathandanga ukubethwa igama sibikele intatheli ukuthi usobhuku uMnumzana Shadreck Mabone uyazithaphuzela omkabo ikakhulu labo abalamadoda asebenza phandle kwelizwe.
“Kuliqiniso sibili ukuthi usobhuku ukhombisa abafazi bethu. Into le wayiqalisa kudala ngemva kokutshonelwa ngumkakhe. Uthandana kakhulu labafazi benjiva.
“Khathesi uhlanyisana lomfazi wenjiva. Ezinye izakhamizi sezike zazama ukuthi zimncwebe indlebe mayelana ngesenzo sakhe lesi kodwa uyaqhubeka ngento yakhe le,” kulandisa isakhamuzi lesi.
Kufinyelele endlebeni zikaMthunywa ukuthi nxa kuholwa amabele bonke athandana labo lake wathandana labo kabasweli okuyabe kuholwa ngoba enguye umkhokheli.
UMnumzana Nkulumo Moyo omunye walabo okucatshangelwa ukuthi umkakhe wake watshontshisa usobhuku ngesikhathi esebenzela phandle kwelizwe uthe kuyabahlupha ukuthi kungani usobhuku lo engazange aphinde athathe esetshiywe ngunkosikazi.
“Uzekela njani ukukhonjwa ngabafazi bethu engathathanga. Khona yindoda enjani ekhokhela isigaba ingela nkosikazi oyisekelayo. Kwelinye ilanga bazayenyula enye indoda isiphezulu kwakhe isimxhanxatha ugqogqogqo ngamazinyo.
“Sithule sikhangele lizafika elilodwa eliyisithutha, kuzatsheka ibhetshu endodeni,” kufunga uMnu Moyo.
Ebuzwa mayelana laloludaba uMnumzana Mabone uthe usebenza labantu bonke kodwa kakhonjwanga ngitsho loyedwa wabo.
“Abantu bayangisukela. Kuqala bangikhupha kumaphephandaba ngodaba olufanayo. Akusilocala ukuthi ngingathathi.
Mina ngiyaqhatsha abantu abehlukeneyo.
“Inina leli abakhuluma ngalo ngalisiza ngemali yokubhadala imali yesikolo yabantwana ngemva kokungifulelela indlu yami.
“Kwake kwathiwa ngithandana lesinye isalukazi futhi kodwa kungasi qiniso,” kutsho uMnu Mabone.
UKhansila wakule indawo uNkosikazi Getrude Gumbo uthe udaba olunjalo alukafiki kuye.
“Udaba lolu alukafiki kimi. Sizachwayisisa ukuze sibone ukuthi abantu bahlalisane ngokuthula esigabeni sethu,” kutsho uNkkz Gumbo.
