uMthunywa
Thando Dube
KULEMULI yelokitshini leMakokoba ekhala ezimathonsi ngemva kokulahlekelwa lusane olulomnyaka lenyanga ezintathu ngemva kokubanjwa ngamagetsi.
UMthunywa uzwe ukuthi isiga lesi esitshiye imuli idanile senzakale ngoLwesihlanu olwedluleyo lapho usane olubambe khona intambo zamagetsi lwabanjwa ngamagetsi lwafa.
Esinye isakhamuzi selokitshini leli esingathandanga ukubethwa ngegama sithe ngesikhathi kusenzakala ingozi le, usane lolu beluloyise.
“Umntwana kuthiwa ubeloyise othe engananzeleli umntwana wakhasa wayabamba amagetsi ngemuva kwefiriji yamtshaya. Bazama ukumgijimisela esibhedlela lapho afika aphelela khona,” kutsho isakhamuzi lesi.
UMthunywa uvakatshele imuli kamuyi bona abaveze ukuthi kusesemasinya ukuthi bakhulume lentatheli.
“Kusesemasinya ukuthi sikhulume lentatheli ngaloludaba,” kuchaza omunye wabo.
Isikhulumi samapholisa koBulawayo uInspector Precious Simango uvumile ukuthi kulodaba olunjalo olwenzakeleyo.
“Kulomtwana olomnyaka lenyanga ezintathu zokuzalwa ofe ngemva kokubanjwa ngamagetsi.
“Sikhuthaza abazali ukuthi bagcine abantwana ngonanzelelo ukuze ingozi ezinjengalezi zingenzakali. Kulicala ngaphansi kweChildren’s Protection Act ukuthi abantwana bengagcinwa ngokunanzelela,” kutsho uInsp Simango.
Intatheli iphinde yakhuluma lesikhulumi seZimbabwe Electricity Supply Authority (Zesa) koBulawayo uMnumzana Lovemore Chinaka othe udaba lolu belungakafiki endlebeni zabo.
“Udaba lomntwana otshwaywe ngamagetsi ngoLwesihlanu belungakafiki endlebeni zethu, kodwa sizadingisisa kabanzi ngalo ngoba kungumlandu wenkampani yethu ukuthi nxa kulengozi yamagetsi sidingisise okudale ingozi le.
“Lokhu sikwenza ukuze sivikele ingozi ezinje ngaphambilini,” kuphetha uMnu Chinaka.
