uMthunywa
Ncekwenhle Ncube
ZISELE zimadolonzima izakhamizi zeNkulumane 11 koBulawayo kuviki ephelileyo kulandela ukugalula kosane oluleminyaka yokuzalwa emibili enditshini yokugezisela imiganu.
Linsindabaphenduli etshiye abantu bezibuza imibuzo engadingimpendulo yenzakale ngoLwesithathu kuviki ephelileyo lapho uNkosikazi Sibonile Ncube athe eqeda ukuhlambulula imiganu watshiya amanzi ngenhloso yokuthi uzabuya awasebenzise njengoba ebengangcolanga engazi ukuthi kuzakuba ngumjibila wosane lwakhe.
Umuyi uSiphamandla Dube (2) ukhasele lapho wasewela ngekhanda okudale ukuthi amanzi la amhitshe afe.
Iphephandaba likazulu likhulumisane loyisemkhulu wosane lolu, uMnumzana Peter Ncube yena oveze ukukhathazeka ngalingozi eyehlele umzukulu wakhe kanti njalo bekukhanya kuyinto alokhe engayiqedisisi.
“Mina iyangixaka lindaba. Akuzwisiseki ukuthi umntwana angagalula emanzini amancane kangaka. Ngendlela abemalutshwana ngayo kasimanzi abengagalulisa umuntu afe.
“Kangihlalisekanga ngokutshona komzukulu wami, asazi kumbe uzingenele yedwa kumbe njalo kulomuntu omkhamele emanzini. Nxa ngihleli kanje ngilokhe ngimbona ngelihlo lengqondo,” kuchaza uMnu Ncube.
Iphephandaba libikelwe ukuthi udokotela onguye ohlole isidumbu uchaze ukuthi okwenze lumntwana watshona yikuthi amanzi ahambe ngomthambo ayangena emaphatshini okubangele ukuthi kubenzima ukuphefumula.
UMthunywa uxhumane lodadewabo kaNkosazana Ncube, uNkosazana Winnie Ncube yena othe noma ebengekho lokhu kusenzakala kodwa kuyinto ebuhlungu kakhulu ebehleleyo njengemuli.
“Kunzima lokhu, akuzwisiseki ngoba indlela abangilandisele ngayo kuveza ukuthi asomanzi abengagalulisa umntwana asitshiye.
“Sizamxhasa udadewethu ebunzimeni lobu abhekane labo. Lokhu akwehlelanga yena yedwa kodwa kusilande njengemuli ngakho kumele senze noma yini ukuthi siduduze umhlobo wethu.”
Unina wosane wehlulekile ukukhuluma loMthunywa ethi usebuhlungwini obukhulu.
Isikhulumi samapholisa koBulawayo uInspector Precious Simango uthe umbiko lo sebewamukele.
“Sichwayisisa ngombiko wokugalula kosane oluleminyaka emibili esiwamukeleyo.
“Sithanda njalo ukucebisa abazali ukuthi bangatshiyi izitsha zamanzi lezikhali ezilimazayo egcekeni ngoba ziyingozi ebantwaneni,” kuphetha uInsp Simango.
