uMthunywa
YiNtatheli kaMthunywa
UMQEQETSHI weqembu lesizwe kumdlalo kanobhutshuzwayo kuqula lama-Under 20 uBekithemba Ndlovu usethule amabizo abadlali afuna ukuhamba labo eZambia kusiya khankaselwa inkezo yeCosafa.
UNdlovu ukhethe abadlali abangu-29 encedisana lomsekeli wakhe, uMark Mathe kuliviki. Abadlali bonke ngabaphuma emadolobheni akoBulawayo laseHarare.
Umncintiswano weCosafa lo uzaqhutshwa kusukela mhlaka 6 kuMpalakazi kusiyafika umhlaka 16 wenyanga efanayo.
Phakathi kwabadlali laba kulabane abatshibilikela iHighlanders uDenzel Khumalo, uNkosana Ndlovu, uBukhosi Ncube loMbongiseni Ndlovu. Abadlali laba kukhangelelwe ukuthi bakhokhele iBosso kusizini ezayo nanko phela iqembu alisafuni lakuzwa ngabadlali bayo asebekhulile.
IHow Mine ngelinye iqembu elikhethelwe abadlali abane lilandelwa yiBantu Rovers ekhiphe abathathu. Ingcitshi yomfana osakhulayo uLeroy Mavunga odlalela iYadah Stars laye ungenile ehlelweni lukamqeqetshi.
Ekhuluma lephephandaba likazulu uNdlovu, umqeqetshi wama-Young Warriors uthe isizatho sokukhetha abadlali emadolobheni amabili sidalwe yikuthi baswele usekelo lwemali yokuthi babhode indawo ezinengi njalo lesikhathi sokuqeqetsha besisilutshwane.
“Sikhethe abadlali abangu-29 esikhangelele ukuthi sibalolonge anduba siphume leqembu elizancintisa eZambia. Okwamanje asikaqalisi ukulolonga,” kutsho uNdlovu.
Kuzancintisa amazwe alitshumi lambili. Isizwe seZimbabwe siphakathi kwequla elibalisa iLesotho, Namibia le Angola.
Amanye amazwe asemhlubulweni ongezansi yelizwe azadlala yiZambia, Uganda, Malawi leSwaziland, South Africa, Mozambique, Egypt leMauritius.
Nansi ithimu kaNdlovu:
Onozinti: Onil Benson (ZPC Kariba), Reward Muza (Chicken Inn), Issah Ali (Caps United).
Imvimbi: Bukhosi Ncube (Highlanders), Mbongiseni Ndlovu (Highlanders), Nyasha Garayi (Bantu Rovers), Kudzashe Dzingwe (Bantu Rovers), Nkosana Ndlovu (Highlanders), Terrance Daka (Aces Youth Academy) Collins Mujuru (Aces Youth Academy), Denzel Taderera (Shabanie Mine), Davison Ncube (Chapungu).
Abasesiswini: Enock Karembo (Yadah Stars), Malvin Kwinjo (Ngezi Platinum Stars), Nicholas Guyo (Aces Youth Academy), Leroy Mavunga (Yadah Stars), Blessing Nyamuzihwa (ZPC Kariba), Shadreck Nyahwa (Bantu Rovers), Tatenda Muringani (Dynamos), Dumoluhle Lunga (Bulawayo City), Denzel Khumalo (Highlanders), Tanaka Chanengeta (How Mine), Clive Rupiya (Bulawayo City)
Abagadli: Nqobile Ndlovu (How Mine), Brighton Ncube (How Mine), Delic Murimba (Hwange), Kudakwashe Mangami (Bantu FC, South Africa) Mandla Mlilo (Ngezi Platinum Stars), King Nasama (Dynamos).
