uMthunywa
YiNtatheli kaMthunywa
SEKULABADLALI abaphuma phambili kwabanye ngobungcitshi kuqembu likanobhutshuzwayo eleHighlanders, lona eseliphenduke into engadliwayo kulezinsuku.
URahman Kutsanzira loTendai Ngulube sebegcwala ingxoxo zababukeli labalandeli bomdlalo abathi ukutshibilika kwabadlali laba kudinga ukubatshazwa. UKutsanzira loNgulube ngabadlali abalikhaba kudala kuBosso njalo imbali yabo kuleliqembu ivela khatshana.
UNgulube ubatshazwa ngabasekeli ababika ukuthi umdlalo wakhe utshintshile ngoba usekwazi ukupasa ibhola liyefika enyaweni zabanye bakhe kanye lokwenelisa ukuthi agadle ngokuzikhandla. Ababukeli benguqu bameyisa uNgulube ngesikhathi efika kuHighlanders. Kwakuthiwa usekhulile njalo awusavuki umdlalo kuye.
UKutsanzira uvuke khwatshu kulandela ukulimala kwakhe idolo, okumhlalise phansi okwenyanga ezedlula ezimbili kulisizini.
Kumidlalo emithathu edluleyo, bobabili batshengisele ukuthi bayawazi umsebenzi wabo nanko lomqeqetshi uErol Akbay uthi usethembe bona.
“Bayadlala sibili. Abadlali laba bobabili bengibakhangele ekuqaleni kwesizini. Abalandeli bethu nxa bekhwabitha indlela abadlala ngayo, lami njengomqeqetshi kuyangithinta.
“Abadlali laba, labanye bonke eqenjini bayazethemba njalo balesibindi sokuhlasela loba yiphi ithimu,” kutsho lumqeqetshi ngemva kokulolonga iqembu ngoLwesithathu ekuseni.
Iphephandaba likazulu belikhona enkundleni yokulolonga kweqembu, lakhuluma labadlali bobabili lapho uKutsanzira othe uzizwa eqinile njalo nguye ozakuba yinsika yokuthi ithimu le ithwale inkezo yeCastle.
“Ngeke ngikutshele amanga, ngiqine saka kulezinsuku enkundleni. Ithimu yethu ifuna ukuthwala inkezo zonke, yikho ngikholwa ukuthi ngizayincedisa ikwenze lokhu,” kutsho uKutsanzira.
UNgulube uthe: “Ngifike ngaba ngumdlali omutsha kuHighlanders kumasizini adluleyo. Ngafika ngachuma kodwa khathesi, ikakhulu kulisizini, ngizibone ngiphakamisa indlela engidlala ngayo. Ngibonga abaqeqetshi bami ngokunginikeza ithuba.”
Kusenjalo, uMthunywa uthole udletshana lokuthi uAkbay kasoke asuke kuBosso kulisizini njengokubika kwamaphephandaba ebulenjini. Umaneja walumqeqetshi uDanford Muntashu laye uphikile ukuthi uAkbay uzayifulathela iBosso.
Bekulembiko ethi uAkbay usefunwa ngamaqembu aseBotswana, eZambia laseSouth Africa.
“Hatshi, angisuki la. Lokho okukhunywa ebulenjini ayisikho,” nguAkbay lo.
