uMthunywa
YiNtatheli kaMthunywa
UMGADLI weqembu leHighlanders uRahman Kutsanzira engatshiya ithimu le ayedlalela iPlatinum Stars yaseSouth Africa nanko kuphuma lembiko ethi usebangwa ngamaqembu athile kuligi yeAbsa Premiership.
Umdlali lo ubikele iphephandaba likazulu ukuba kusukela esafunda esikolo wayefisa ukuthi ayezama inhlanhla eSouth Africa.
NgoLwesibili uMthunywa uxoxe lomdlali lo ngesikhathi eqeda ukulolonga. Ubike ukuba angeke atsho okunengi ngokubizwa kwakhe eSouth Africa kodwa nxa kungenzeka kuyabe kuyisibusiso.
“Ukuyadlalela phetsheya kwelizwe yisifiso somdlali wonke. Nxa kuliqiniso ukuthi kulamathimu athile afuna ngiwadlalele, kuyajabulisa.
“Loba ngilesifiso sokuthi ngiyedlala phetsheya, ngiseselomlandu wokuthi ngiqhubeke ngidlalela iHighlanders.
“Iqembu leHighlanders lingenze ngabangumdlali ohlonitshwayo. Ngibona angathi ngizaphumulela kulisizini,” kutsho umdlali lo.
UKutsanzira uqale umnyaka lo ngesivutha phakathi laphakathi kwenkundla. Uthabise umqeqetshi uErol Akbay ngokutshengisa ukutho uyenelisa ukuhlohla njalo uyingcitshi yokutshaya imbekwa.
“Kuzabonakala nxa isizini iqalisa ukuthi ngibukhali enyaweni. Kumeke ngidlale kuhle, ngiphathise iqembu ukuthi liphumelele,” nguKutsanzira lo.
Ngokudlala kakuhle akwenzileyo kunkezo yeZNA Charity lakumidlalo yeBulawayo Football Festival, uKutsanzira unconywe zingcitshi zenguqu, zibika ukuthi ukutshibilika kwakhe kuzatshiya amaqembu ekhamisile.
