uMthunywa
Cornelius Luphahla
ZISABAMBE eyangaphansi izakhamizi zesigabeni seMafinyela, eLupane ngemva kokuba enye indoda yakule indawo igamule umkayo kabuhlungu ngehloka wafa kubangwa impahla.
Insindabaphenduli le yenzakale ngoLwesihlanu kuviki ephelileyo lapho umetheswacala uNhlanhla Sithole aqumaqume khona umkakhe uNkosazana Florence Jache esola ukuthi kungani elande impahla zakhe ngemva kokuba sebehlukene.
Kubikwa ngemva kokuba uSithole esenze icala leli waya enkambeni yamapholisa wayabika ukuthi usebulele umuntu okudale ukuthi abotshwe.
Isidumbu sikamuyi sasiwa esibhedlela.
UMthunywa uxhumane loMnumzana Felix Nkomo oyisakhamuzi sakule indawo wathi izigangi sezinengi kule indawo njalo lobugebengu sobubunengi.
“Izigangi sezinengi kakhulu kule indawo ngoba eminyakeni eyisithupha eyadlulayo uyise kaSithole lo osebulele umkakhe wagamula ipholisa lizombophela ubusela. Kuthe ngoMabasa uEditor Moyo wagwaza uMoyana Nyoni wafa kubangwa intombi. Khathesi uSithole usegamule umkakhe wambulala. Lokhu sokusitshengisa ukuthi indawo le kayisela kuthula,” kutsho uMnu Nkomo.
Ekhuluma lentatheli uNkosazana Elinah Mafu oyisihlobo sikamuyi uthe yena wezwa ngomsindo ekuseni wathi efika wathola uSithole esebulele umkakhe.
“Mina uMaJache wadlula emzini wami ehamba labafana ababili labobabhemi ethi bayathatha impahla zakhe azithenga ngamabele ngesikhathi ethethwe nguSithole. Ngamxwayisa ukuthi ngabe uhambe labantu abadala ukuze kungabi lomsindo kodwa wala wathi bakhulumile loSithole.
“Engelasikhathi eside edlulile ngezwa umsindo koSithole ngagijima ngaya khona ngathola uMaJache esefile eganyulwe ngehloka uSithole waphinda wamehlukanisa izitho zomzimba. Ngabiza abantu ukuthi sizoncedisana kodwa sathi sisamangele sabona uSithole esethutsha ngemota esebotshwe ngamapholisa bethi nguye obatshele ukuthi usebulele umuntu,” kulandisa uNkszn Mafu.
Imizamo yokukhulumisana lesikhulumi samapholisa esabelweni seMatabeleland North yehlule.
