uMthunywa
Nkosilathi Sibanda
USUKE eGoli ngeSonto wafika koBulawayo ngoLwesithathu, etshova ibhayisikili.
Ufike eqinile, engakhali ngitsho ngokukhathala.
Lo nguMeli Ndlovu oyintshantshu yomdlalo wamabhayisikili osebenzise lumdlalo ukuthi akhankasele ezemfundo ezikolweni encediswa yinkampani yeDingani Publishers.
Ngomnyaka odluleyo, uNdlovu watshova umango ofanayo ekhankasela ukulwisana lomkhuhlane weCovid-19.
Ekhuluma lentatheli ngesikhathi efika, uNdlovu ubike ukuba uhambo lwakhe beluluhle kodwa bekula lapho ahlangane khona lobunzima ngoba ubetshova eyedwa.
“Ukutshova uwedwa akukho lula kodwa ngihambe kuhle,” kutsho uNdlovu odabuka eKezi kodwa ehlala eGoli.
Ukhulume njalo ngokuthi ubelesizungu phakathi komango.
“Ukutshova uwedwa akujabulisi ngitsho. Kulengozi futhi. Nxa litshova libanengi kuba lula ngoba liyabe liduduzana, lixoxa xoxa lapho nxa lithe laphumula kancane. Bengihlele ukuthi ngize labanye bami abatshova amabhayisikili kodwa kwehlule. Okuhle yikuthi ngiwufezile umsebenzi. Abantwana ababale ama-study pack aphuma kuDingani Publishers.”
NgoMpalakazi ka2021, uNdlovu wasuka eMidrand wafika koBulawayo ngemva kwamalanga amabili. Ukutshova kwakhe lokhu sekulethe inkulumo kwabezemidlalo abazibuza ukuthi ukwenza njani ukutshova amalanga amabili umango oyi-833KM.
UNdlovu wamukelwe ngusaziwayo kwezomculo uMadlela Skhobokhobo, andubana ayephumula.
UMadlela utshele intatheli kaMthunywa ukuthi uyakuncoma okwenziwa nguNdlovu ngokusebenzisa ezemidlalo ukukhankasela ezemfundo.
