uMthunywa
KULOSOMABHIZIMUSI we-Headlands, olezitolo e-Eagle Nest okubikwa waqhatsha isigelekeqe ukuthi siyebulala umntwana simphathele ikhanda lakhe ngenhloso yokwenza imithanithani yokukhulisa ibhizimusi.
Ngokunjalo isigelekeqe lesi uTatenda Mudziwedare oleminyaka yokuzalwa engu-20 wesigabeni se 5B eSherenje umiswe phambili komthethwandaba we-Rusape Regional Magistrate phambi kukamantshi uMnumzana Francis Mapfumo esetheswa icala lokuphosa abulale umntwana oleminyaka yokuzalwa eyisikhombisa, ethunywe nguJohn Madondo. UMadondo lo kuthiwa ukwele Mzansi, ngakho ubekhuluma lo Mudziwedare kumakhalekhukhwini emtshela lokho amele akwenze.
UMtshutshisi uMnumzana Tawanda Munjanja elandisela inkundla ngodaba lolu uthe kwakumhlaka 28 Nhlolanja ngehola lesikhombisa ekuseni ngesikhathi uMudziwedare esezitolo zeSherenje wasebona umamangala ehamba labanye abantwana besendleleni yesikolo seSherenje Primary School.
Umtshutshisi elandisela inkundla uthe umetheswacala wagijimisa umamangala ongu-Grade 1 wenelisa ukumbamba. Ngemva kokumbamba wamkhama entanyeni ngezandla zakhe zombili. Kuthe kunjalo umetheswacala wabona kuthutsha izakhamizi bucudlwana wasephangisa wekela umamangala wadliwa ngumswenya. Udaba lolu luphumele egcekeni ngemva kokuba umamangala elandisele unina ngodaba lolu.
