uMthunywa
AKALIBONI iphutha elenzeke emtshadweni wakhe owesilisa okusabalale i-vidiyo yakhe ezinkundleni zokuxhumana, ephikisa izifungo zomfundisi.
UMnumzana Linda Mthethwa obetshada lo Nkosazana Tiny Mthethwa eNtuzuma ngoMgqibelo, uthe akonakalanga lutho emtshadweni wakhe ngoba ubengeke avume ukufunga amanga.
Utshele Isolezwe ukuthi selokhu kusabalele lividiyo umkakhe udinga ngitsho ukwelulekwa ngokomqondo ngendlela aphatheke kabi ngayo ngokutshiwo ngabantu ngabo.
“Yini nje elibona kubekhona okonakeleyo emtshadweni wami. Kodwa umtshado uhambe kahle, manje ngihleli lomkami sesilayo lencwadi yomtshado. Umkami sengihlale laye isikhathi eside bengingeke ngizotshelwa ekucineni ngumfundisi ukuthi sizakwehlukaniswa yikufa. Kungani kumele kufakwe ukufa ezifungweni sengathi kukhona okumele abulale omunye. Ubuf…kuphela yibo obuyasehlukanisa mina lomkami ngoba okwamanje usaziphethe kahle,” echaza.
UMthethwa othe ulezingane ezintathu lomkakhe, uthe usola umthwebuli wabo ngokusabalala kwezithombe zabo le-vidiyo.
Ngemva kokuvela kwe-video abantu abanengi kuFacebook lakuTwitter bebekhala ngokuphoxa kukaMthethwa, bedabukela umakoti.
Kule vidiyo, uMthethwa uma kumele afunge ukuthi bazabekezelelana uma becebile noma bempofu, uphendula ngokuthi vele bampofu. Ebuzwa ngalokhu uthe vele ubephendula okuyikhona.
“Vele ngingene ezindlekweni ezinkulu kabi lasezikweledini ngilungiselela ukuthi lolu suku lube luhle. Kulezi zikweledi engingene kuzo kuyacaca ukuthi ngeke ngisaphinde ngicebe ngoba kusekude ukuthi ziphele,” kutsho uMthethwa.
Kwenye i-vidiyo uMthethwa ubonakala esiyahlangabeza umakoti ngaphambi kokuqala komtshado. Ugaqa ngamadolo kukhaphethi ebomvu, usukuma esephambi komkakhe, ambambe ngengalo.
Lalapho uthe akaliboni iphutha ngoba ubekhombisa ukuthi umthanda kangakani umkakhe.
Wenqabile ukuphendula ukuthi ubekhelele umagwebu yini njengoba abanye besola lokho. UNkkz Mthethwa uthe akukho azakutsho ngoba vele umonakalo usuwenzakele.
Uthe uphatheke kabi ukuthi ngeke kusacitsheka ezinkundleni zokuxhumana okubhalwe ngabo. — uBULEMBU
