uMthunywa
Cornelius Luphahla
ZIKHUZA imihlola njalo zimadolonzima izakhamizi zesigabeni seZidulini, eNkayi ngenxa yomunye usomabhizimusi ongusobhuku kule indawo olabantwana abahlanyayo abahlanu okwenza zicabangele ukuthi kungabe kubangelwa ngondofa balindoda asebemhlamukele.
Usomabhizimusi lo, uMnumzana Thomas Moyo okucatshangelwa ukuthi angabe ehlutshwa ngondofa bakhe asebaze bambulala lamehlo babuya njalo bamqedela imfuyo lamabhizimusi.
UMthunywa esizwa ngalokhu uphuthume wayafika kule indawo wakhulumisana loMnumzana Brian Masina oyisakhamuzi sakule indawo wabikela intatheli ukuthi uMnu Moyo ulabantwana abahlanu abagula umkhuhlane wengqondo njalo abantu bacabangela ukuthi kungabe kubangelwa yikuthi ulabondofa asebemhlamukela.
“UMoyo ngikhuluma nje ulabantwana abahlanu abahlanyayo ngenxa yabondofa bakhe. Abantwana laba bagoqela uEsnat, uThabani, uChelesani, uThethelelani loChris. UChris yena wanyamalala wahlala iviki engabonakali waze wayatholakala ehlabela esihlengeni somfula uGweru ugcwele phamu.
“Into eyasimangalisayo yikuthi wayephezulu kwesihlahla esihlengeni leso ehlabela asazi ukuthi wayesidlani. Sathi nxa simbuza ukuthi ufike njani ethi ulethwe ngabafana bakayise abancane njalo yibo akade bemupha ukudla. Yikho okwenza sakholwa ukuthi uMoyo ulabondofa sibili,” kutsho uMnu Masina.
Ekhuluma lenthatheli uMnumzana Fibion Mathe uthe usomabhizimusi lo sowaphelelwa zinkomo lempahla zakhe ngenxa yabondofa bakhe. “UMoyo kudala wayelenkomo ezinengi kakhulu ehlala elamabele amanengi. Kwathi ngesikhathi abantwabakhe beqala ukuhlanya yahle yaqala ukwehla inotho yakhe ezinye inkomo zakhe zanyamalala, ezinye zafa sokuze kusele ezinlutshwana.
“Isigayo ayelaso sasesithula sodwa siphakathi kokugayisa sibuye silunge njalo. Ekucineni sasingasasebenzi omakanika babethi nxa besihlola bethi kasifanga waze wathengisa injini yaso,” kutsho uMathe.
UNkosazana Sikhanyisiwe Bhaca ubikele intatheli ukuthi uMnu Moyo wake wabanjwa ngabaphurofethi ukuthi ulabondofa abahlupha ababalisi esikolo wabuya waphandlwa ngondofa laba waba yisiphofu.
“UMoyo wake wabanjwa ngabaphurofethi ukuthi nguye olabondofa abahlupha esikolo ngokutshontsha ukudla kwababalisi kanye lokulala labo ebusuku. Lenye njalo inyanga eyabuya lapha yakhuluma into efanayo.
“Ngemva kwalokho sezwa kuthiwa kasaboni utshaywe ngumalulwane emehlweni wahle waba yisiphofu. Lokhu kwenza sakholwa ukuthi utshaywe ngundofa wakhe,” kutsho uNkszn Bhaca.
Ebuzwa ngale indaba uMnu Moyo uvumile ukuthi ulabantwana abahlanyayo wathi kakwazi ukuthi bahlanyiswa yini kumbe ngamadlozi.
“Kuliqiniso sibili ukuthi ngilabantwana abagula umkhuhlane wengqondo kodwa khathesi bathathu abalokhe behlanya. Owakuqala nguChelesani oleminyaka engu-41, waqala ukuhlanya ngo1997. Omunye nguThethelelani manje lo kungcono kasahlanyi kakhulu kodwa kuyavuka.
“UChris yena uleminyaka engu-26 njalo lokhu egula, okwakhe kwaqala 2007 ngesikhathi kufanele abhale imihloliso kaFomu-4. Samthola esesihlengini somfula ngesikhathi eqala ukuhlanya. Lokhu angazi ukuthi kungabe kudalwa yini kumbe kudalwa ngamadlozi,” kutsho uMnu Moyo.
Uqhubekele phambili wathi abantu bayamzonda yena kalandofa njalo ukungaboni wakwenziwa ngesinye isakhamuzi esimzondayo.
“Ukuthi ngilondofa ngamanga, abantu bayangizonda njalo beze bethi ngilabondofa abahlupha esikolo babengiqambela amanga. Abanye bathi ngondofa bami abangihlanyisela abantwana khonapho beqamba amanga.
“Ukungaboni lokhu ngakwenziwa ngesinye isakhamuzi esingizondayo esangithumela umalulwane wangitshaya ngiphuma esambuzini ngambamba ngamtshayelela phansi wahle wanyamalala. Kuthe kunjalo ngezwa amehlo ami esegcwele itshebetshebe ngahle ngangasaboni. Sengathengisa inkomo ezingu-14 ngizama ukuzelaphisa lokwelaphisa abantwabami,” kulandisa uMnu Moyo.
Inyanga eyingcitshi kwezamasiko uMnumzana Samson Sibanda ebuzwa mayelana lesehlakalo sokutshaywa komuntu ngumalulwane abe yisiphofu ithe into enjalo ingenzakala nxa kukhona umuntu olesandla kulokho.
“Indaba yokuthi umuntu atshaywe ngumalulwane emehlweni engasaboni ingenzakala nxa umalulwane lo engowomuntu ngoba umalulwane nje ngeke akwenze ube yisiphofu. Ngalokhu-ke kuyadingakala ukuthi umuntu onjalo aye kubosiyazi ayecela ukukhanyiselwa kuphela angakhulumi ukuthi ufuna ukuhlolwani. Nxa inyanga leyo ikwazi ukutshaya amathambo izatshaya ikubone ibe isimsiza,” kuphetha uMnu Sibanda.
