uMthunywa
Ncekwenhle Ncube
UMCULI odume kakhulu kwezokholo uInnocent TMS Nyoni ukhangelele ukuhwatsha elinye idlalade lomhlaba elizaguqula abanengi kungakedluli inyanga kaMabasa lonyaka.
Umculi lo oqale ukubonakala kakhulu emphakathini ngemva kokukhupha idlalade elithi Ngakhiwe ngomnyaka ka2015 ebelilengoma eziyisithupha uchazele intatheli ukuthi leli elisebhodweni lizabe lilengoma eziyisificaminwe mibili. Zonke ingoma ezilapha ngezokholo.
“Leli idlalade eliphekwayo okwamanje liyababa. Lilengoma ezingu-8. Ngilethemba abalandeli bomculo wezokholo bazabusiseka ngengoma zakhona.
“Idlalade leli lilesihloko esithi Kawaphakame okuchaza ukuthi amandla kaNkulunkulu sifisa ukuthi abonakale eAfrica yonke ukuze adunyiswe.
“Ingoma ezilapha zilendimi ezintathu. Kukhona isiNdebele, isilungu kanye lesiShona. Lokhu kungenxa yokuthi sifisa ukuthi izwi leNkosi lifinyelele indawo zonke zomhlaba anduba inkosi izothatha abayo.
“Idlalade leli sizaqala ukulivula ebhokisini eVictoria Falls. Sikhethe indawo le ngoba yikho lapho esilabalandeli abalihlekana esilethemba lokuthi nxa singavakatshela khona sizenelisa ukutshumayela sisebenzisa umculo. Sizabuya njalo sivakatshele indawo ezifana leHwange kanye lePlumtree ukuze idlalade leli lifinyelele bonke abantu.
“Phezulu kwakho konke ngidlulisa kakhulu isibongo kubalandeli bami ikakhulu eGwanda lakoBulawayo. Uxhaso lwabo kudlalade lami lakuqala lwangenza ngazizwa ngikhudumala ngafisa ukuqhubekela phambili ngomculo.
Ngilethemba lokuthi lonyaka bazasisekela ngamandla.
UNyoni ubikele intatheli ukuthi akulula ukupheka idlalade ngakho kudingeka ukuqinisela lokukholwa.
Ubuye njalo waveza ukuthi kudlalade lakhe eliphekwayo uncediswa ngabahlabeleli abadala enkundleni le abagoqela uRebecca Malope loNkiwane.
