uMthunywa
Thokozile Mbedzi
ZIMANGELE izakhamizi zesigabeni seMavuku Mabonyane eKezi ngaphansi kwesigaba senduna uFuyana Ngwenyama ngemva kokuba omunye undoda ezibophele ethethiselwe ukuthi uthandane lomntwana wesikolo.
Lesi siga senzakale ngeviki ephelileyo lapho uMnumzana Phathisa Dlamini (22) azibophele ngemva kokuba elinye inina lithembise ukumbophisa ngoba encinde uluju lwemvelo lendodakazi yalo efunda uFomu (2).
UMthunywa uxhumane loNkosazana Siphethokuhle Ndlovu oyisakhamuzi wathi uMnu Dlamini wehluleka ukukhuluma udaba lwakhe labanye abantu okwacina kubangela ukuthi azibophele.
“Kubikwa inina elizala intombi kaDlamini ekuFomu 2 lamthembisa ukumbophisa okwenza uDlamini wanakana ukuthi kungcono aziyele kogoqwanyawo kulokuthi aye ejele. Unkazana lo obefunda eTshatshane High School ubebonakala laye uDlamini ngaso sonke isikhathi njalo kulabanye abathi wayeke abonakale ephakathi kwezimota zabantu abatshiyeneyo.
“Okwenziwe nguDlamini kwethuse abantu abanengi angithi indaba ezinje ziyahlalelwa phansi abantu bakhulume baxolisane manje kubizwa kuthiweni nxa esezibulele kanje? Angithi phinde simbone futhi. Kubuhlungu kakhulu okwenziwa ngabantu kulezinsuku, labo abantwana abaselakho ukuziphatha,”kulandisa uNkosazana Ndlovu.
UMnumzana Dumisani Moyo oyisihlobo sikamufi uveze ukuthi bathithibele ngesiga lesi njalo ngeke bakukhohlwa empilweni.
“Kangila nkani ngesiga lesi, abantu kasekeleni ukuhlukumezana nxa sokulohlupho. Sekele amapholisa enze umsebenzi wawo.
“Umama lo ozala inkazana le okukhulunywa ngayo bekumele angakhulumi kubi ngoba ngizwa kuthiwa ukhulume amagama abuhlungu qede amthembise ukumbophisa. Thina njengabemuli sidabukile ngaphakathi, sifisa ukuthi ngabe abantu bahlalisana phansi bayihlafuna lindaba kungakabi lokujikelana amagama abuhlungu,” nguMnu Moyo lo.
UMnumzana Mongi Sibanda uthe abantu abanengi abasayizwisisi indawo le ngoba kungaba lokungezwani phakathi komfana lenkazana isiphetho umfana uyazibophela .
“Mina iqiniso indawo le angisayizwisisi ngoba uDlamini ayisuye wakuqala ukuzibophela ngalindlela. Banengi bezibophela ngenxa yokungezwani kundaba zothando esigabeni lesi. Bakhona abakholwa ukuthi ungakhombisa eMavuku Mabonyane lezinye indawo eziseduzane isiphetho uyazibophela.
“Indawo le ngibona angani kukhona okumele kukhangelisiswe ngabadala,” nguMnu Sibanda lo.
Omele isikhulumi samapholisa esabelweni seMatabeleland South uAssistant Inspector Nkosilathi Sibanda ebuzwa ngale indaba uthe indaba enjalo sebeyizwile njalo bakhuthaza uzulu ukuthi abikele amapholisa kumbe abakhulu besigaba nxa kulokuhluphayo emphakathini.
