uMthunywa
Langelihle Moyo
KUYAJABULISA ukuzwa umuntu wesilisa elesifiso uzwelo lentshukuntshu yokufuna ukuxhasa kanye lokuphakamisa abesifazane.
U-Ishmael Gumbo oleminyaka yokuzalwa engu-32 odabuka elokitshini leGwabalanda koBulawayo, usevule inkampani ebona ngabathanda ezokutayila (modelling) ethiwa yi-Dapper Visuals.
“Ngananzelela ukuthi kulamantombazane alesifiso njalo alesiphiwo sokutayila kodwa abanelisi ukuthi bafike ezingeni lokuthi bakhanye emphakathini ukuze iphupho labo lifezeke.
“Ngaphandle kokubafundisa ukutayila ngikhangelele ukuthi ngisize amantombazane kwezinye inhlangothi ezitshiyeneyo lazo ezizabatshiya sebekwelinye izinga empilweni.
“Inhloso yami yikuthi amantombazane enelise ukuthi batsho okuthile ngempilo zabo ngokutayila.
“Zikhona inhlanganiso engikhangelele ukuthi ngizasebenzisana lazo ezingancedisa ukufundisa amantombazane ngokuthile ngempilo njalo angenza amantombazane azizwe ekhululekile ukuthi lawo atsho okuwahluphayo lasebekebahlangana lakho empilweni lokuthi bafisa ukuncediswa njani.
Uthe ufisa kube lenguquko kwezokumodela, uthe yena ubona engani abantu bayesaba ukukhuluma kungcono-ke bazame ukuthi batsho okuthile ngokumodela. “Ngifuna benelise ukukhuluma lokhu abakubonayo njalo abahlangana lakho nsuku zonke besebenzisa umsebenzi lo kanye lempahla abazigqokayo bewenza.
Uphethe ngokuthi i-modelling agency yakhe izasebenzisana lamanye ama-agency akhona elizweni.
“Ngikhangelele usizo oluvela kundawo ngendawo elizweni, ukuze sisize amantombazane ayiwo imbokodo zethu zakusasa, asibaphakamiseni abantwabethu abangamankazana singabekeli belahleka,” utsho njalo.