uMthunywa
Nkosilathi Sibanda
UMQEQETSHI wabonozinti uPeter Nkomo ulakho ukuphenduka kuqembu leHighlanders nxa inkokheli zalithimu zingavumelana ukususa uAmini Soma Phiri kumbe uCosmas Zulu kuqembu elikhulu.
Lokhu kuza ngemva kokuba inkokheli zibika ukuthi zitshaywa ngamakhanda ngenxa yokulwa okukhona phakathi kukaSoma Phiri loZulu.
Ngeviki edluleyo uMthunywa ukubike kuqala ukuthi iBosso iseduzane lokuxotsha omunye wabaqeqetshi laba, ikakhulu uSoma Phiri nxa ukungezwani kungaqhubekela phambili.
USoma Phiri ngumsekeli kamqeqetshi uErol Akbay. UZulu ungumqondisi webhentshi labaqeqetshi.
Umbiko owethulwe ngumfakazi ophezulu emahofisini eHighlanders ngothi iqula le-executive lisacabanga ngokuqhatsha uNkomo.
Kubikwa “kulabadala” bethimu abalombono wokuthi uNkomo aqhatshelwe ukulolonga onozinti, kuthi uZulu aqine ngokuncedisa uAkbay.
UNkomo kubikwa ulakho ukuphenduka kulithimu kusizini ezayo. Okwamanje uZulu nguye ololonga onozinti.
UNkomo, odume ngelithi “Oxo” kunguqu, kalathimu ayisebenzelayo.
Umqeqetshi lo watshiya umsebenzi wakhe kuBosso walandela inengi lengcitshi zenguqu ezaya kuzimbamgodi zePlatinum edolobheni leZvishavane.
Ngaleso sikhathi iFC Platinum yayibhadala amaqubaquba emali ithenga abadlali labaqeqetshi bamanye amathimu.
Kulenkokheli yeBosso encwebe uMthunywa indlebe yathi ithimu yezwe lonke isicabanga ukuthi imqhatshe lumqeqetshi.
“Kukhanya umdala uOxo sebeke bamtshayela ucingo abadala, nxa kungakabi njalo, kutsho ukuthi bazakwenza kumalanga alandelayo.
“Esikwaziyo yikuthi kulequla lethu elivumelana lokuthi uOxo kumele aphenduke ngoba uleCV enzima njalo nguye yedwa ongathi uyazi ukulolonga onozinti,” kutsho inkokheli ephezulu kuHighlanders engathandanga ukuqanjwa ibizo.
Iphephandaba likazulu lixhumane loNkomo kuliviki obike ukuthi kakezwa lutho kuqembu leHighlanders kodwa uhlezi emelele ukusebenzela ithimu eyamenza waba lodumo.
UNkomo uhlonitshwa kakhulukazi ngokulolonga onozinti ababalisa uMamkhwebu (Brighton Sibanda), uWashington Arubi loAriel Sibanda.
UArubi waba ngumdlali owedlula bonke ngesizini yeCastle ngo2011, kuthi uSibanda uthole isicoco sokuba ngunozinti kuzwa ka2012.
