uMthunywa
Yintatheli kaMthunywa
UNOBHALA wenhlanganiso yeFootballers Union of Zimbabwe uPaul Gundani kasekho.
UGundani kubikwa ufele edolobheni leKwekwe izolo, ngoLwesithathu. Ukufa kwakhe kwethuse inengi labadlali abakade beyingxenye yeFootballers Union of Zimbabwe abasebenza laye kakhulu kulinhlanganiso.
UGundani wadlala inguqu waba lodumo kuqembu lama-Warriors ngesikhathi kutshisa iqula leDream Team eliqeqetshwa nguReinard Fabisch. Wadlalela njalo iZisco Steel le-Lancashire.
Umongameli weFUZ uDesmond Maringwa, ongumngane kamuyi omkhulu, wethule umbiko kumaphephandaba izolo emini ebika ngokwedlula komfowabo.
UGundani uzakhunjulwa ngokusungula kwakhe inhlanganiso yeFUZ emela amalungelo abadlali benguqu.
UMandla “Lulu” Mpofu ukhiphe inyembezi ngokuzwa kokufa komngane wakhe.
“Ngilusizi bakithi ngoba imuli yenguqu ilahlekelwe kakhulu ngokufa kukaGundani. Ngadlala laye sikuZiscoSteel ngaphinda ngakhwabitha umdlalo wakhe engaphansi kweDream Team kaFabisch.
“IZimbabwe ilahlekelwe kakhulu. Asisoke sithole umuntu owayelesiphiwo sobukhokheli njengaye. Ngithi lala ngokuthula mfowethu,” kutsho uMpofu ngosizi.
