uMthunywa
YiNtatheli KaMthunywa
UNOZINTI weHwange Ladies FC uPamela Mhlanga usebike ukuba ulesifiso sokuphenduka kuqembu lesizwe elamaMighty Warriors ngoba akula nozinti ovimba njengaye elizweni lonke.
Unozinti lo ukhulume lokhu ezitshaya isifuba ngesikhathi ebuzwa ngenhloso yakhe kulisizini ka2017 njengoba amaqembu amanengi eseqalisile amalungiselelo okuqinisa abadlali, andubana isizini ivulwe.
Ngesizini edluleyo uMhlanga wabizwa kuqembu lamaWarriors kodwa wehluleka ukuthi ayefika enkambeni yokulolongela esigodlweni.
Ekhuluma lephephandaba likazulu ngoLwesibili, uMhlanga uthe uhlose ukuthi adonse amehlo omqeqetshi wamaMighty Warriors uShadreck Mlauzi ukuze amfake enhlelweni zakhe kuqula labadlali azabasebenzisa kulisizini.
UMhlanga usethole inhlonipho ngokuba ngunozinti obamba ukwedlula bonke, kuwo wonke amaqembu adlala inguqu yamantombazana. Iqembu lakhe leHwange Ladies FC selidonse imidlalo eminengi lingahlohlwa.
“Akula unozinti obamba njengami. Isifiso sami yikuthi ngidlalele isizwe seZimbabwe kumaMighty Warriors. Ngiyazi ukuthi abanengi abasoke bakukholwa ukuthi akula nozinti ovimba njengami kodwa ungabuza labo abajwayele ukubukela inguqu yamantombazana bazakutshela ukuthi ngempela ngiyalibamba ibhola.
“Ngilethemba lokuthi umqeqetshi wamaMighty Warriors uShadreck Mlauzi uzangikhumbula, angikhethe kulumnyaka ngoba ngifuna ukubonakalisa ithalenta lami,” kutsho uMhlanga.
Unozinti lo oleminyaka yokuzalwa engu-28 uthe kubalulekile ukuthi abaqeqetshi bamaqembu esizwe badinge abadlali abaphuma phandle kwamadolobho amakhulu iBulawayo leHarare.
“Ithalenta ligcwele emaphandleni, ikakhulu lapho okudlalwa khona inguqu yamantombazana. Aluba abaqeqetshi bayathola ithuba lokubukela amathimu akundawo ezikhatshana lakoBulawayo, ngabe sikhuluma ngenguqu yaphezulu kumaMighty Warriors.”
