uMthunywa
Siphathokuhle Ngulube
Salibonani bafundi. Zinjani izifundo zenu? Ngithemba liqhuba kuhle kakhulu. Lamuhla ngifisa sikhangele amazwi la aphezulu athi, “Ungumuntu onjani wena” Siyake siwezwe yini la amazwi?” Kwabanye benu la amazwi ajwayelekile kakhulu ezindlebeni zenu. Abanye sesize siwezwa angathi amnandi kanti ngitsho asomazwi okumele siwajabulele la.
Umzali ungamuzwa ehlala ekhuluma la amazwi zinuke amakhwapha uzibuze imibuzo ukuthi kanti kuyini okwenza umzali akhulume amazwi la kuwe. Inkulumo le yande ukuhamba lenzondo emangalisayo kumbe sithi lokudakeka okuthile.
Iphimbo elisetshenziswa ngumzali nxa ekhuluma la amazwi akwandanga ukuthi libe lihle ngoba umzali uyabe esecunukile ngokwenza kwakho. Futhi amazwi la bafundi ayabe ekhomba ukuthi umzali usefike ekucineni ngawe akasazi nje ukuthi enzeni.
Zinengi izinto ezingenza ukuthi umzali akhulume la amazwi. Abanye benu alifuni kwenza kuhle esikolo. Abafana umzali uyasebenza nzima athole imadlana engatsho lutho abophe isisu ayethenga isigqoko sesikolo. Kungabe kulibhurugwe kumbe isiketi samantombazana.
Ngokuthatheka nje ngezinto ezingakusindawo wena uthathe isigelo ungene lelobhulugwe uliqume libengani lizagqokwa ngumfana ongaphansi kwakho uthi nxa uligqokile libalekele isicathulo isokisi ulibone lisuka phansi lisiyahlangana lebhulugwa. Lithi linjalo ibhulugwa ufice selincitshiswe okokuthi umuntu nxa ehamba uhamba nzima okumangalisayo.
Nxa kuyintombi isiketi siqunywa okokuthi umuntu uyehluleka lokukhothama adobhe ulutho oluthile. Nxa uthi gaga esikolo umbalisi athi ayisiyo indlela yokugqoka buyela ngekhaya uyebuya lomzali. Maye ngomzali osebenza nzima ethenga lezo mpahla. Ngokwazi kwakho umumo wangekhaya usuzadoja-ke ukuya esikolo. Umbalisi uthe buya lomzali kodwa sekunzima ukuthi umazise ngesiga sakho lesi.
Abanye njalo yilabana abangahloniphi abazali babo. Umzali akutshele ulutho olulodwa aze atsheke umlomo. Phela umzali uqala esakukhuza ngothando kodwa aze acine esedakekile nje ngawe. Khona nxa ungumuntu kufanele ukhuzwe kanye ulalele. Ungabona usutshelwa ulutho kanengi kuhle uzinuke amakhwapha. Ngemva kokuzinuka amakhwapha phela kumele uguqule ukwenza. Kujwayelekile-ke ukuthi abazali nxa sebediniwe ngokwenza kwakho batsho bathi, “KANTI UNGUMUNTU BANI” Kuhle uzihlukuluze ngamazwi la uzihlole ngawo, ungawatshayi indiva.
