uMthunywa
YiNtatheli kaMthunywa
IMULI kamuyi uRahman “Rush” Gumbo iveze ukuba uzangcwatshwa ngoMgqibelo, eLady Stanley.
UGumbo, owake waba ngumdlali weDream Team, udlule emhlabeni ngoLwesihlanu ebusuku ngeviki edluleyo esibhedlela seFrancistown
Academic lapho angeniswe khona ngemva kokugula esemzini wakhe ePalapye.
Ubeleminyaka engu-59 yokuzalwa.
Ngelanga lomngcwabo wakhe ubezakube efikisa iminyaka engu-60 yokuzalwa.
Wedlule emhlabeni ngemva kwensuku ezimbalwa ehlukene leqembu leBotswana elidlala kuPremier Soccer League, iMorupule Wanderers.
Omele imuli uZeblon Mhlanga, ongumalume kamuyi uthe: “Engingakutsho, kubukeka sengathi izinto zihamba ngendlela, ekuletheni isidumbu sikaRahman.
“Sibonga usekelo esilutholayo njalo izihlobo zethu eziphuma endaweni ezifana leTsholotsho, Nyamandlovu lezinye seziqalile ukufika.”
Uthe ikhansili yakoBulawayo inikeze imvumo yokuthi uGumbo afihlwe eLady Stanley.
“Ikhansili yakoBulawayo isinikeze indawo lapho esizabeka khona umuyi. Kuzaqhutshwa isikhumbuzo eBulawayo Amphitheatre andubana kuqhutshwe umngcwabo ngoMgqibelo, ngelanga lakhe lokuzalwa,” kutsho uMhlanga.
UGumbo wayengumdlali oyingcitshi kuBosso kunye lakuqembu lamaWarriors, elaboWillard Mashinkila Khumalo, Madinda Ndlovu, Alexander
Maseko, Abraham Mbambo, Mercedes “Rambo” Sibanda, Benjamin Konjera lo-Adam “Adamski” Ndlovu.
KweleBotswana kulapho uRush athola inhlonipho njengomqeqetshi kumaqembu abalisa iGaborone United, Township Rollers leMochudi Centre Chiefs.
Ngaphandle kokuqeqetsha iHighlanders kuleli, uGumbo uke waqeqetsha kuqembu leCaps United, FC Platinum, Bulawayo Chiefs, Technosphere, Bulawayo Wanderers, Motor Action leChicken Inn.
Uke wadlala eCyprus laseDenmark. Insuku zakhe zokudlala zaphela ngokulimala edolweni ngo-1993 eleminyaka engu-30.
Umuyi uphuma emulini yezelamani ezilitshumi lanye. Utshiye umkakhe uVirginia Gumbo, abantwana abane uBukhosi, Mkhuseli, Mandisa loThabo.
Abantu babuthene ku-13 Lendy Road, North End koBulawayo.
