uMthunywa
UMDLALI waseZimbabwe uTendai Ndoro kungenzeka kube nguye oqalayo nxa iqembu lakhe i-Orlando Pirates lidlala leKaizer Chiefs emdlalweni weNedbank Cup ngoMgqibelo ntambama.
Kubikwa uNdoro usehlelweni lokukhethwa ngumqeqetshi u-Eric Tinkler kodwa umqeqetshi lo okwamanje usedideke ingqondo phakathi kokukhetha uNdoro, uLehlohonolo Majoro loThamsanqa Gubuza.
UTinkler uthe uMajoro udlale okumjabulisileyo emidlalweni emibili edluleyo. Umqeqetshi lo uthe kazi ukuthi abambe ayekele kuphi ngokuthi ngubani okumele agadle ngaye phakathi kwabagadli uNdoro, uMajoro loGabuza.
Umqeqeshi lo kafihli ukuthi ngeviki eledluleyo ubekhala ngokuphathwa likhanda ngokuthi nguphi umgadli azaqala ngaye ngoba loNdoro usehlohla okuzwayo.
“Kungenzeka kube nguMajoro oqalayo kumidlalo elandelayo ngoba udlale kuhle.
“Angazi ngizofaka bani ngoba loNdoro udlale kahle, bengingafuni ukumkhipha uMajoro njengoba lokho bekuzobulala ukuzethemba. Usebenze ngokuzikhandla. Yilokho okungijabulisayo. Angazi ngizokwenze njani ngoba loThamsanqa Gabuza laye uyabuya. UGabuza ngithe akayophumula ngoba ubelegcindezi enkulu evela kubalandeli futhi engelayo inhlanhla yokuhlohla,” kutsho uTinkler.
Uthe okuhle ngomdlalo weChiefs yukuthi kuba lula kuye njengomqeqetshi ngoba wonke umdlali uyazimisela.
“Kulimpelaviki akula abadlali abazathi balimele futhi akekho ozobe efika sekudlule isikhathi ejimini,” kutsho uTinkler.
Umqeqetshi lo uthe iNedbank Cup sekulithemba labo lokucina lokubuyela emidlalweni ye-Caf ngomnyaka ozayo.
Iqembu elizanqoba umqhudelwano weNedbank lizadlala kuConfederations Cup.
“Sifuna ukuthi sibuyele e-Afrika siyodlala emiqhudelwaneni yeCaf ngomnyaka ozayo. Lokho singakwenza ngokuthi sinqobe iNedbank Cup. Okunye kufanele sigxile ekuya phezulu ku-logu.”
Uthe bayafisa ukuthi iChiefs leMamelodi Sundowns benze kahle e-Afrika.
“Sibafisela inhlanhla kodwa kasifuni ukuthi banqobe indebe yase-Afrika thina singakayinqobi kuqala,” kutsho uTinkler.
