uMthunywa
Ethel Ncube
ZISELE zithithibele izakhamizi zeDolo eMberengwa ngempelaviki usobhuku uDula Moyo obeselesikhathi ephika esemba phansi ukuthi undofa owakhitshwa embhedeni ngowakhe, ezivumela phambi kwenduna ukuthi undofa ngowakhe okucine kubangela ukuthi umkakhe amfulathele.
USobhuku uMoyo, undofa kanye lomkamnewabo okubikwa nguye owamnika umbheda bamiswe edale lenduna uBankwe ngempelaviki edluleyo.
Induna uBankwe ihlawulise usobhuku uMoyo imbuzi ngesenzo sakhe sokugcina undofa lesi.
Ekhuluma loMthunywa omunye umfakazi oqotho uveze ukuba indaba kandofa sidale ingxabano emulini yakoMoyo.
“Imuli yakoMoyo ayisezwani ngondofa owaphuma embhedeni. Undofa lo wayeqhiyile okutshengisa ukuthi ngongumfazi. Usobhuku ubengasalali lonkosikazi wakhe ngenxa yakhe.
“Uthe esekhitshiwe waswela umnikazi kodwa phambi kwenduna usobhuku wazivumela engabanjwanga ngamandla ukuba ubesesaba amehlo omphakathi ukuthi avume ukuthi ulondofa,” kubika umfakazi lo.
Uqhubekele phambili eveza ukuba lokhe bevele enduneni usobhuku kasela kuthula.
“Usethwele amagabha avuzayo usobhuku, abakwabozala bathi kungcono bathathe umntanabo ngoba ngeke ahlale esondla ondofa. Ngikhuluma nje uMoyo kasakwazi ukuthi abambe ngaphi ngondofa wakhe lo.
“Okungcono nje yikuba undofa sebamkhupha singazi kumbe uzadinga omunye kodwa abantwabakhe labo bayambuza ukuthi ubevele emsebenzisani lowondofa kodwa kalampendulo,” kulandisa umfakazi lo.
UMthunywa uxhumane lenduna, eyiyo eyathonisa icala likandofa sekujikelwana ukuthi ngokabani, uBankwe ochaze ukuba iqiniso livele egcekeni.
“Umnikazi kandofa uMoyo uzivumele yedwa ukuba undofa ngowakhe, uthe yena wayesesaba amehlo abantu ukuthi avume phambi komphakathi.
“Ngimhlawulise imbuzi eyodwa ezadliwa khonapha enduneni yinkundla yonke,” kubika induna uBankwe.
Imizamo yokukhulumisana losobhuku uMoyo yehlule ngoba ucingo lukhala lungadojwa.