uMthunywa
Intatheli kaMthunywa
SEKUXOTSHWE abaqeqetshi ababili ekhangele kodwa uBekithemba Ndlovu akumethusi lokhu ngoba ubika ukuthi uzayincedisa iBulawayo City kunkinga zayo kuligi yeCastle Lager.
UNdlovu ngumqeqetshi wesithathu kuleliqembu elisekelwa ngemali yekhansili yakoBulawayo. Anduba inikeze uNdlovu umsebenzi omkhulu, iBulawayo City yaxotsha uAmin Soma Phiri loDarlington Dodo ngenxa yokudliwa kweqembu.
Kukhanya kunzima ukuthi ayivuselele ithimu uNdlovu nanko kumdlalo wakhe wokuqala ekhuza iqembu wehlulwe nge 1-0 yiFC Platinum enkundleni yeLuveve.
Iziphathamandla zeqembu, zikhokhelwa ngumgcinisihlalo uJerry Sibanda zibike ukuba nxa uNdlovu ewufuna umsebenzi, kumele abone ukuthi iBulawayo City ayisuswa kuligi yeCastle Lager.
Amakhosi ahlezi kunombolo yetshumi lasithupha kungalane, alemiklomelo elitshumi lanhlanu kuphela.
USibanda kayifihlanga eyokuthi ithemba labo likuNdlovu. Uthe umlandu wokunqoba ukumqeqetshi lo.
“Sesimnikeze ingqobe umqeqetshi uNdlovu. Nxa engenza kuhle kutsho ukuba umsebenzi wakhe ukhona.
“Iqembu lingasinda ukuxotshwa kuligi, silakho ukukhulumisana laye simnikeze ithuba lokuthi aqhubeke.
Loba sikhala ngokuba kusimo esibi kulogu, silalo ithuba lokuthi sidlale kuhle njengoba kusele imidlalo engu-13.
Iqembu leBulawayo City selinqotshwe emidlalweni elitshumi lane phakathi kwe-21 eseliyidlale lonyaka.
Ekhuluma ngemva komdlalo, uNdlovu uthe uzayidonsa ize ithole ukunqoba.
“Iqembu liyaqina njalo ngithemba ukuthi sizaphaphama sithole ukunqoba.”
UMpofu uthe okumupha ithemba elokuba ikusasa yeqembu leBulawayo City inhle kakhulu yikuba kulabadlali abambalwa abasakhulayo abesebedlala kusigaba sePSL.
