uMthunywa
Nkosilathi Sibanda
UPHILIP Chiyangwa umongameli weZifa usekhulume kwezwakala ukuthi udaba lokuthengiswa kwemidlalo yamaWarriors seluqhutshelwe amapholisa eZRP, okutsho ukuba uNation Dube, uHenrietta Rushwaya, uKudzai Shaba loEdzai Kasinauyo bazabotshwa.
UChiyangwa utshaye inja engafihli umphini ukuthi ijele limelele bonke abacatshangelwa ukuthi babopha iqhinga lokubheja ngomdlalo womkhankaso weAfcon ka2017 phakathi kweZimbabwe leSwaziland. UDube obengumsekeli kamqeqetshi wamaWarriors kubikwa umangalelwe ukuthi wabonakala enika abadlali abathile imali okucatshangelwa ukuthi ingabe iyi-$5 000 munye ngamunye.
“Inhlanganiso yeZimbabwe Football Association isimangalele abantu abayisithupha emapholiseni, sikhangelele ukuthi abophe laba bantu yiloba yisiphi isikhathi kusukela khathesi.
“U-Ian Gorowa nguye ongezwayo ukwedlula bonke,” nguChiyangwa lo.
Umongameli wenhlanganiso yenguqu yakuleli lo wengeze ngokuthi uyazisola ngokuxolela uRushwaya labo bonke ababelamacala okuthengisa imidlalo yama-Warriors kuzigigaba zeAsiagate. Uthe uzisola kakhulu ngoba uRushwaya loShaba abazange betshiyane lomkhuba wabo. UShaba lo kubikwa usebenza njengomaneja wabadlali.
“UShaba lo ugange kazazi. Isithupha sakhe sokuba yi-player agent sesimthathele. Sabaxolela kucala lakuqala leAsiagate kodwa khathesi sengicabange ukuthi siwavuse wonke amacala la. Khathesi kukhokhela mina ngakho ngithi bazatshona bonke.”
Kusenjalo uDube, ophinda abengumqeqetshi weHwange ubikele iphephandaba likazulu okwesibili ukuthi kazi lutho.
“Ngiyaphinda njalo bakithi, akulanto engayenzayo. Ngifela amafufu njengegundwane nje,” nguDube lo kuliviki.
UChiyangwa uthe kuyaziwa ukuthi labo abacatshangelwayo bazaliphika icala leli kodwa kumele babekwazi ukuthi amapholisa azabadinga.
“Bonke bazabanjwa. Akula ozabaleka ngoba udaba selusemapholiseni. Okunengi bazakutsho emthethwandaba.”
