uMthunywa
Ukuhluzwa kogwalo
SIQHUBEKA lendaba yethu yamajaha ayesezimisele ukuyalwela inkululeko yelizwe leZimbabwe. Ngamajaha ayesekhethe isinqumo sokufa lokuphila yikho nje sibabona bedabula amagusu esabekayo amnyama tshu bezama ukuchapha baye elizweni elingaphetsheya ukuze bayeqeqetsha ngokufaneleyo ngezokulwela impi, abanye njalo babebuya sebevelela khona kweleZambia sebevela qeqetshwa.
Amajaha siwatshiye esenelise ukuchapha bazitshwathika ezixukwini belinde ukusa becatshele lesitha laso esasibadinga ngamehlo abomvu.
Amajaha la ayelabaphathi abehlukeneyo okuyibo njalo ababeqondisa inhlelo zabo zonke ngolwazi lwabo lwezempi. Labo-ke abasebesekhaya babelenhloso yokugcwalisa izigaba ezifana leLupane, Nkayi, Tsholotsho kanye nje lenkabeni yelizwe. Ngalesi senzo kwakuliqhinga lokudonsela isitha kulezo ndawo, sona-ke sasibuya ngelokuzohlasela kambe sesibona lapho umjibila odlela khona.
Kwakuzathi-ke nxa sekunjalo labana ababengaphetshaya kweleZambia bathole ithuba lokuchapha bengena ekhaya njengoba nje imingcele yayizalele impisi isitha sivale savitsha ukuze kungabikhona ongenayo. Impi yakhona yayifuna amandla adibene lamaqhinga ukuze bazibone besiba lengqubelaphambili.
Sihamba leqembu lomlobi wendaba onguye uMzilakawulandelwa ngegama. Yena-ke elakhe iqembu lalikhokhelwa nguMthakathi omnyama. Amagama alaba abakhokheli ayesitsho, ayelenkulumo okwamagama kukanti labanikazi bawo babehamba belingisa lawo magama ababezinike wona ngesikhathi sempi.
Umlobi laye ungena isigaba angasaziyo, bona-ke beqonda kwelaseNdamleni, eSilwane, eJibajiba kanye leNdwane.Uhambo lwabo luqhutshwa phakathi komnyama owesabekayo kungela ngitsho sona isibane sokukhanyisa indlela kodwa lokhu kwakudingeka amehlo abukhali ayedabula indlela eyesabekayo.
Yibunzima ababehlangana labo, labo ababezimisele ukulwela impi yenkululeko, bekhilikithela phakathi komnyama owesabekayo, konke ababehlangana lakho babethuzana lakho phakathi kobumnyama lobo, inyamazana zeganga ezesabekayo babephambana lazo phakathi kobumnyama lobu. Siyananzelela sebezithela phezu komhlambi wezilwane lazo ezithi zingabona umuntu zithi yikudla.
Baliphundla igusu elimnyama tshu baze bazibona sebebhobokela emasimini, kulapho ababalethemba kanye lesiqiniseko ukuthi basebephakathi kwezakhamizi. Lapho-ke kwasekumele banyathele beqaphile ngoba isitha laso sasikuthanda ukuncandama duze lemizi ukuze sibone kuhle abangena bephuma phakathi kwemizi lapha, kuhle kube yisikhathi sokuhlasela. Izikhamizi yizo ezazingosiphatha ndaba, bonke abedlulayo babebonwa yizakhamizi kungakho umuntu wonke wayejabulela ukuyahlola kuzo.
