uMthunywa
Nkosilathi Sibanda
UMCULI wakuleli osacathula uMncedisi Mvumeni usethule isicelo kubathandi bakaMaskandi ukuthi basukumele phezulu bathenge idlalade lakhe abika ukuba livutha ngamaphimbo lesiginci esimnandi.
Indoda le, edabuka eFilabusi, icula iseSouth Africa, okulapho esebenza ihlala khona loba nje ifisa ukuthi umculo wayo ufinyelele uphindwe uthandwe lapha evela khona.
UMvumeni ukhiphe idlalade elithi “Ungishiyile” elimumethe ingoma ezilitshumi lasitshiya galombili.
Utshele intatheli yephephandaba likazulu ukuthi loba esesebenzile ngalelidlalade, uzafuna ukuthi athole isikhathi sokuthi aliqhunse kuleli.
“Bantu bakithi, ngicela kini lonke ukuthi lithole isikhathi lilalele umculo engiwuphekileyo. Ngilincenga kanje ngoba ngifuna lizwe ukuthi lathi esizalwa eZimbabwe, siphuma koGodlwayo siyawazi umculo kaMaskandi. Nanti idlalade lami elitsha, ngithi kalisekelwe yini bandla,” kutsho uMvumeni, ekhuluma eseSouth Africa ngoMvulo kuleliviki.
Kudlalade lakhe, uMvumeni uthe uhlabela ngezothando, ukholo, ezomdeni lokunye okukhathaza impilo zabantu.
“Umculo wami ngokaMaskandi. Ngiyazi ukuthi abantu abanengi eZimbabwe sengathi abakholwa ukuthi sikhona lathi esicula uMaskandi. Yikho ke lokho, sesikhona.
“Ngiphethe idlalade elilengoma ezibalisela isihloko sedlalade ‘Ungishiyile,’ ‘Themba Lami,’ ‘Utshwala, Udlame,’ ‘Ndabazakho’, lezinye ezitshisayo. Zonke ziphelele zilitshumi lambili,” kutsho umculi lo.
Ingoma zedlalade likaMvumeni zaqoqwa, zaphekwa nguye, waphinda wakhokhela kubaculi ababalisela iqula elamncedisayo elibizwa ngokuthi Amadinwa.
“Isiginci se-lead satshaywa yinsizwa okuthiwa nguBahluphile. Ibass guitar yatshaywa nguMjey. Uphurojusa ngu Thuthani Ndlovu. “Zonke ingoma ziyatholaka kuwo wonke ama-digital platform.
Asixhumeni khona silalele, sikele umsebenzi. UMvumeni ucela usekelo njalo uyathembisa ukuthi ngeke aliphoxe, uzohlala elethulela ingoma ezimnandi ngendlela emangaliso,” kutsho uMvumeni.
