uMthunywa
Gladmore Ncube
BAQINISILE abadala nxa besithi okungapheliyo kuyahlola njalo inotho ngamazolo.
Umdlali weYadah FC, uRoderick Mutuma lo owathatha i-golden boot ngokuhlohla amabhola amanengi ngesizini ka-2011, usedonsa nzima nanko phela selokhe wasuka kuqembu leHighlanders akasaliboni igedi.
Kulisizini uMutuma akusoke kukhulunywe ngaye. Umdlali lo kangeni lakukhalenda yabadlali abazingcitshi. Ulakho ukuthi angatholi ngitsho leqembu elingafuna ukumthenga ngomnyaka ozayo.
UMutuma wathatha isicoco sakhe sokuhlohla amabhola amanengi ngesikhathi edlalela iDynamos ngomnyaka ka2011, okwaphathisa njalo ukuthi iDeMbare inqobe inkezo yeCastle Lager kuligi. Umdlali lo wathatha isicoco saphezulu lesi ngokuthela emambuleni amabhola angu-14.
Ngemva kokubongwa ngesicoco uMutuma wakhetha ukuthi ayedlalela kwelaseSouth Africa ku-Bloemfontein Celtic lapho owafika khona wakwenza kwabasobala ukuthi izinto ziyabuya zidlule njalo okunye lokunye kulesikhathi sakho.
Wafika wadlala kodwa kazange enelise ukuhlohla kuleli iqembu ngitsho lebhola elilodwa.
Ukufika kwakhe eMzansi wathatshelwa kakhulu ngoba phela wayengomunye wabadlali abenza ngcono kunguqu yakuleli kuligi ye-Castle Lager Premiership. Ekufikeni kwakhe eMzansi uMutuma wafika kulabadlali abatshisayo kulelo ababalisa uKatlego Mashego owayedlalela iMoroka Swallows owahlohla amabhola angu-13 ngalowo mnyaka, elandelwa nguBenad Parker owayetshovela iKaizer Chiefs owenelisa ukuhlohla amabhola angu-12 loCuthbert Majalila owahlohla angu-11.
Ukuhlohla okwenziwa nguMutuma kwamvulela ithuba lokuthi ancintisane lengcitshi nanko wazama ukungena ngomfutho uMutuma eSouth Africa kodwa kwaba ngumlilo wamaphepha ngoba kazange enze lutho, wehluleka lokuhlohla elilodwa nje elokulahlisa.
Wathi ebona ukuthi sekunzima, uMutuma wakhetha ukuzodlalela iBosso ekuqaliseni komnyaka ka2017. Ekungeneni kwakhe kwakukhanya angathi uzakwenza okungcono ngoba wathembisa ukuthi ufuna isicoco se-golden boot egqoke umbala weHighlanders kulisizini.
Umdlali lo wababaza ukuthi ufuna ukwenza izimanga zokunqoba ekuqembu yakoBulawayo le, kodwa wavoxa udaka ngesikhathi ekulo. UMutuma watshiya ehlohlele iBosso amabhola amathathu kuphela.
UMutuma wakhetha ukuyazama impilo engcono kuYadah Stars iqembu likamphurofethi uWalter Magaya. Abalandeli beBosso bathi bebona ehamba abazange babelendaba laye ngoba kwakusobala ukuthi lapho ayakhona uyadinga imali ethe xaxa lomthandazo wokuthi adlale ngcono eqenjini likamphurofethi.
Ukuphuma kwakhe kuHighlanders watshela abantu wathi ufuna ukuyadinga imali ngoba wathi isivumelwano ababe laso ayisiso esenzakalayo ngakho wabona kungcono ukuthi atshiye iqembu leBosso. Yebo siyakubona ukuthi wasuka kuBosso wayakuYadah kodwa ke lokhe engaliboni igedi ngoba akukhanyi ukuthi walandani kuYadah njengoba engenzi lutho nje.
