uMthunywa
UKNOX Mutizwa usekhomba ngophakathi kuqembu leGolden Arrows lapho afike wathola inhlalakahle nanko ubika ukuba akulanto ayiswelayo kuleliqembu.
Umdlali lo usenxuse abadlali abakuHighlanders okwamanje ukuthi bakhuthalele ukudlala eSouth Africa. Imbiko esigcwele emulini yabathandi bomdlalo kanobhutshuzwayo ithi ubunandi bempilo yeGoli bubuzwa kulumdlali.
UMutizwa wafika kubafana besithende ebolekwe kuqembu leBidvest Wits lona elalingafuni ukumdlalisa.
Ngokungena kuGolden Arrows, uMutizwa usehlohla mihla yonke.
Kungxoxo ayithumele kumaphephandaba kuliviki, uMutizwa uveze ukuba ufisa ukuthi ahlale kuGolden Arrows okwamampela.
“Lokhe ngafika kuGolden Arrows angikaze ngiswele lutho. Ngijabulile kuleliqembu. Ngifisa ngabe ngidlalela lona impilo yami yonke,” kutsho uMutizwa.
Ubike ukuba uzizwa ebusisiwe ngokuthi umqeqetshi weGolden Arrows uClinton Larseb uyamethemba.
“Ngathi ngifika kuleliqembu ngahle ngaphiwa ithuba lokudlala. Ngiyayisebenzela indawo yami eqenjini lakuqala.
Kuyathokozisa sibili ukudlala lapha. Umqeqetshi uyangethemba njalo ungitshela ukuthi ngingene enkundleni ngidlale umdlalo wami.”
UMthunywa uthintane lomdlali lo ebulenjini buka-Facebook lapho aveze ukuthi kuGolden Arrows kulempilo engcono.
“Impilo yangapha kuGolden Arrows yehlukile. Nxa ungumdlali uyazizwa ukuthi uyahlonitshwa. Ukuvuka ekuseni usiya lolonga kunikeza umdladla lokuzethemba. Aluba amaqembu aseZimbabwe enza okufanayo, ngabe lebhola lethu limnandi kubadlali.”
UMutizwa uthe mihla yonke ukhuthaza abadlali abalethalenta abadlala kuHighlanders ukuthi babuye ngobunengi babo eGoli.
“Abadlali abenza kuhle ababuye ngoba lapha eSouth Africa kulebhola elingcono njalo umdlali uyasuthiseka.
Okumqoka yikudlala kuhle lokuzimisela,” kutsho umdlali lo. — Ubulembu
