uMthunywa
Ncekwenhle Ncube
ZIBABAZA zingathuli izakhamizi zeLusulu eBinga kulandela ukuzwa ngomunye umfundisi (48) ophuce elinye ikhehla (66) eselimpunga isithandwa salo lakhalala umuzi emavikini amabili edluleyo, uMthunywa ukuzwile lokho.
Lindaba esitshiye amadoda ehleli manzonzo yenzakale esigabeni seLusulu eBinga ngaphansi kukasobhuku uElisha Makama.
Intathelizindaba ibikelwe ukuthi uMnumzana Rodger Ndlovu (66) uke walwa lomfundisi webandla leAssemblies of God uMnumzana Lawrence Khumalo (48) waze wambulalela ifoni yakhe ethi udla mnganu munye laye kugogo uLizzy Khabo (60).
Kubikwa loludaba lwaze lwafika emapholiseni kodwa babiselwa ngekhaya ukuze bayekhumisana umlotha njengomakhelwane.
Kuzwakele ukuthi emavikini amabili adluleyo emngcwabeni obukhona esigabeni lesi uMnu Khumalo ubengumaqhuzu ezimbizeni waphakululela uMaKhabo umkaNdlovu inyama enengi. Lokhu akumphathanga kuhle uMnu Ndlovu.
Abasiki bebunda bachaze ukuthi uMnu Ndlovu waxabana lomkakhe ngenxa yokuthi uthandana lomfundisi njalo ubone indlela aphakulelwe ngayo emfeni ukuthi balokhe besaqhubeka ngento yabo.
Omunye umfakazi oqotho ongathandanga ukubethwa ngegama uthe uMnu Ndlovu ufulathele umuzi wakhe ngoba ethi umkakhe ungenisa umfundisi nxa engekho emzini wakhe.
“Kuliqiniso ukuthi uMnu Ndlovu uhambile watshiya umuzi wakhe. Kuqala bake baxabana kwatshaywa umakhelwane wabo lo ongumfundisi ethi nguye ophakathi kwabo.
“Indaba ibuye yalumatha ngemva kokuthi umkakhe efakelwe inyama enengi ngumfundisi emfeni emavikini amabili edluleyo,” kulandisa umfakazi lo.
Ebuzwa mayelana lalindaba umfundisi uLawrence Khumalo uthe ukuxabana kwabakhona lokhulu uNdlovu kodwa yena kathandani loMaKhabo.
“Mina ngezwa sengibizwa kokhulu uNdlovu. Ngathi ngifika ukhulu wathi mina sengisidla mganu munye laye kunkosikazi wakhe ugogo uMaKhabo. Wasuka lapho wangitshaya ngesitulo ngaphosa ngephuka unyawo.
“Okokuthi mina ngafakela umkakhe inyama enengi akusiqiniso. Yimi engangikhangele izimbiza emfeni kodwa ngangingaphakululi,” kutsho uMnu Khumalo.
Usobhuku wakule indawo uMnumzana Elisha Makama uchaze ukuthi walamula olukhulu kule imuli. Ukhuthaze izakhamizi ukuthi zingachithekelwa yimizi yazo eyakhiwa kudala ngenxa yamadlecatsha.
“Udaba olunjalo sike saluhlalela phansi sizama ukubhula umlilo. Sicela abantu bengachithi imizi yabo mahlayana nje,” kutsho uSobhuku uMakama.
