uMthunywa
ISIKHATHI sekhefu leKhisimusi yisikhathi senjabulo kodwa sandise ukuba lobubi ngenxa yezingozi ezinengi emigwaqweni.
Inengi lengozi lezi zibangelwa yikunatha utshwala okwedlulisileyo okwenziwa ngabantu ngalesi sikhathi.
Umfundisi Tsietsi Makiti webandla leGabola kweleSouth Africa uthi isikhathi sekhefu lonyaka kasisoze sifane lezinye nanko phela bona njengebandla bafuna ukukhulekela amadimoni aphakathi kotshwala ukuthi aphume.
“Thina njengebandla sifuna ukukhulekela amadimoni aphakathi kotshwala ukuthi aphume atshabalale.
Ngoba sikholwa ukuthi kuhle ukunatha kodwa akumelanga abantu banathe baze bacine bengena ezingozini zemihlo lemihlobo.
Sifuna utshwala busidake ngendlela emnandi njalo sizabukhulekela,” kutsho uMfundisi Makiti.
Uthe bazakhulekela imihlobo etshiyeneyo yotshwala.
“Siyazi ukuthi akusibantu abangaziphathi kuhle nxa benganatha ngamadimoni aphakathi kotshwala enza bangaziphathi.
Sizawakhulekela amadimoni la aphume aphele,” nguTsietsi lo.
Silethemba ukuthi amadimoni la azatshabalala ngempela.
“Sizakube sikhulekela ikhefu elilotshwala obunengi kodwa elingela zingozi kanye lamacala.”
Wengezelele wathi abafuni njalo ukuthi abantu banathe utshwala besebetshaya omkabo.
“Asifuni njalo ukuthi abantu banathe bangene ezimoteni besebebangela ingozi ezizababulala bona kanye labanye abantu abamsulwa.”
Uthe bafuna abantu bangene kumnyaka ka2022 bengabaphilayo.
Uphinde wathi bazakwamukela amalunga amatsha ebandla azabhabhathizwa ngotshwala.
UMaria Kau (47) uthe ulindele ukwamukelwa njkengelunga elitsha kubandla leli.
“Sokungiphuzele ukuthi ngingene kubandla leli ngibhabhathizwe ngotshwala engibuthandayo.”
