uMthunywa
Ethel Ncube loBongani Ndlovu
ZISELE zinkemile izakhamizi zelokitshini leCowdray Park koBulawayo ngemva kokuba omunye umtshado umiswe okwamahola amathathu sokuthutshe omunye umfazi ethi ngeke kutshadwe ngoba indoda etshadayo ngeyakhe.
Umtshado lo ocine ususabhayisikopo ubukhona ngempelaviki njalo kubikwa uMnumzana Pearson Moyo okunguye obetshada ubetshiye umfazi wakhe aseleminyaka engu-17 elaye endlini wahamba wayatshada lomunye njalo umfazi ongumbalisi uNkosazana Silibaziso Sibanda. Kubikwa umfazi ka Moyo uthe esizwa udletshana ngendaba yokutshada komkakhe wamane wagijimela lapho ebekulomtshao ethi uyawumisa kodwa kwehlula ngoba evalelwe ngamapholisa.
Esinye isakhamuzi ebesikhona emtshadweni lo uMnumzana Joel Moyo uveze ukuba abakaze babone umtshado umiswa ngale indlela.
“Sithe silokhu sisahlezi silinde umakoti lomyeni wakhe ukuthi bafike sezwa sokuyisiwowowo umfazi omdala wendoda etshadayo esethutshile.
“Umfazi ufike engasadlanga nkotshana wayahlala esitulweni sabatshadayo kwabancane indawo. Ingoma ebitshaywa yahle yathula esetshinga ethi akulamuntu otshadayo ngoba yena nguye umnikazi wendoda.
“Ekhuluma njalo abatshadayo bengakafiki kube labantu abahle bathinta umakoti lomkakhe kumakhalekhukhwini bababikela ngokwenzakalayo kukhanya imota zabo zahle zaqonda emapholiseni.
“Amapholisa afika lapho okutshadwa khona athatha umfazi lo yiloba ubetshinga esadalala engasabambeki efuna ukuyadonsa umakoti lesigqoko esimhlophe,” kubika uMnu Moyo.
Uqhubekele phambili eveza ukuba emapholiseni babhula oluphuphumayo.
“Lapho-ke sasesibukele ukudla kwamehlo indoda isiphelelwe ingani yinhlanzi etshelwe ngamanzi umakoti elunguze ngefasitela emoteni, wawungakaze ubone, abakibo kamakoti sebekhupha amadola aweMelika bezama ukudiza umfazi bethi kayekele umtshado uqhubeke wala ukuthatha imali yakhona wathi ufuna indoda yakhe.
“Amapholisa amvalela umfazi okwamahola athize imota zagijima zayaqedisa umtshado endlini, akula okwenziwayo kwathiwa akudliwe masinyane kusikwe lekhekhe abantu bahambe ezindlini zabo.
“Umtshado lo kukhanya wawufihlwa lapho abatshadela khona, ayisiyondlu yabo njalo abahlali khonapha,” kubika uMnu Moyo.
UMthunywa uxhumane lesinye isihlobo sakibo kamfazi ongathandanga ukuveza igama lakhe uchaze ukuba lokhe besadidekile ngomtshado lo.
“UMangena lomkakhe baleminyaka engu-17 behlala lomkakhe nango segijima sesiyatshada kwenye indawo. Kutsho ukuthi kayiwa ngezidwaba kumbe wayesebone imali katitsha yikho okwamenza watshada, thina umtshado sasingawazi salimukiswa ngomunye ekuseni ukuthi ubaba lo uvukele emtshadweni ekuseni saphenquza sidinga lapho okulomcimbi khona sawuthola kwachitheka izitshebo.
“Imali zaziphuma kuthiwa sincenge umfazi athathe imali azihambele wala wathi ngeke athengise indoda ngamaUSD yena yikho amapholisa amvalela umtshado wayaqhubeka, asazi ukuthi aphiwani lawo mapholisa ngoba cala bani ayelalo, kazange atshaye muntu kumbe athethise muntu. Indoda yayisiyinkukhu enethwe ngamanzi phakathi kwesudu ifuna ukubiza umfazi ukuthi bakhulume umfazi weqa wahle wathi wena angikhulumi lawe,” kubika lesi sihlobo.
Iphephandaba likazulu likhulumisane lomnikazi wendoda le uNkosazana Nora Sithole ovumileyo ukuba wahamba esiyamisa umtshado
“Indoda le sileminyaka engu-17 sihlala sonke wavela walobola ngakithi, kwangimangalisa sengisizwa kuthiwa uyatshada ngayidinga indawo yakhona ngayithola ngafika ngathi konke akume ngoba otshadayo ngumkami.
“Ugogo lo atshade laye kuthiwa ngumbalisi kumbe yimali asazi, indoda isikhathi sonke lesi besihlala sonke langelanga ezavuka esiyatshada walala kimi, khathesi angimboni lokhe watshadayo wahle wahamba lesalukazi sakhe kakaze abuye endlini. Ngelanga lomtshado ngangizonde ngigane unwabu ngingabambeki bekhupha amaUSD kuthiwa ngiwathathe ngala ngathi angithengisi ndoda mina, ngifuna yena lapha. Omamazala lezinye izihlobo zomkami zazicecile zicecele umtshado kamakhwapheni okutsho ukuthi babekwazi, mina bengihamba ngingazi lutho kukanti abantu bahlela umtshado,” kubika uNkszn Sithole.
Intatheli ixhumane loMnumzana Mangena owabalekela umfazi esiyatshada lomakhwapheni oveze ukuba kuliqiniso ukuthi utshade lomunye umfazi.
“Umfazi lo sehlukana ngo2016 kudala wangixotsha endlini yakhe. Akusiqiniso ukuthi ngisiyatshada ngasukela kuye, ngasukela ngakithi lomnawami owayekhaphile. Isimanga yikuthi ukuzama ukudiliza kwakhe akulancedo ngoba mhla womsindo besesilamaviki sihlanganisiwe emthethwandaba, isithupha sesilaso, laphana sasesisiyazithokozela kuphela. Ngangizagqoka njani isudu yena ekhona ngisiyatshada lomunye mina ngilokhu ngilaye, libona kusenza na?” kuveza uMnu Moyo.
Imizamo yokuxhumana loNkosazana Silibaziso Sibanda ocatshangelwa ukuba watshada lendoda yomnikazi yehlule ngoba ucingo lungangeni njalo loMnumzana Moyo ephikile ukuba ulaye eduze.
