uMthunywa
Gladmore Ncube
KULOMPHUROFETHI wesigabeni seManguba ePlumtree otshiswe izandla ngondofa bomunye usomabhizimusi ezama ukubakhipha.
Umphurofethi uEphraim Mpala utshe izandla kumaviki amabili asanda kwedlula endlini kasomabhizimusi uMnumzana Sandiso Maphosa lapho obekulomlindelo wokukhipha ondofa abesebemthwalise nzima.
UMthunywa ukhulumisane loNkosazana Sibonakaliso Ndlela othe umphurofethi lo watsha okwesabekayo ngesikhathi esincane.
“Umlindelo lo ubusulesikhathi eside kukhulunywa ngawo kumenywa abantu ukuthi babuye. Wonke umuntu ubehambile emlindelweni ezobona ukuthi kuzahamba njani ngoba kudala uMaphosa lemuli yakhe bakhala ngokuthi bahlutshwa ngondofa osebulele ibhizimusi labo lokulayitsha lelezitolo alisahambi kuhle.
“Abaphurofethi baqala ukubuya emini umsebenzi waqalisa ntambama. Kwasontwa okwesikhathi kwathi sekuphakathi kwamabili yikho esabona khona abaphurofethi bengena endlini kaMaphosa yokulala baphuma bethwele izigubhu ezilamanzi amnyama lempande ezibomvu ezibotshwe ngezintambo eyimibala ehlukeneyo.
“Ekuphumeni kwabo umphurofethi uMpala waqonda emlilweni esiyalahla ondofa labo, ngesikhathi esincane wabonakala esitsha abantu baphithizela iguma lonke ngoba bebona sekusitsha izandla zomuntu hatshi ondofa.
Kwezwakala abanye abafundisi benyenyezelana besithi ondofa laba balamandla kumele bayelahlelwa elwandle,” kuchaza uNkszn Ndlela.
Intatheli ikhulumisane njalo losomabhizimusi uMnu Maphosa ibuzisisa ngaloludaba othe yena okwenzakala emlindelweni lo yizimanga zodwa.
“Sekulesikhathi eside ngikhathazwa ngondofa laba ezitolo zami, kuyacatsha impahla ngingakwazi ukuthi zisuka zisiya ngaphi. Okunye njalo sengiwiswe zimota zami kathathu ngivukela esibhedlela njalo ngiphathiswa ngabazalwane ngemithandazo.
“Ondofa laba bafakwa ngabantu abangizondela ibhizimusi yami njalo ngiyabazi, ngabanye omakhelwane bami ababambanayo bangidingela ondofa kwathiwa omunye aphambanise ezitolo omunye angene ezimoteni zami.
Khathesi sengihamba eSouth Africa ngebhasi ngoba ngingahamaba ngemota yami ngiyabhewuka.
“Ekutsheni kwakhe abanengi babaleka kodwa abanye ababili abalesibindi yibo abamdobhayo bathela izandla ngobhuqu bezicitsha umlilo.
“Engabona khona ukuthi ngundofa yikuthi wayengasakwanisi ukuthi aphume emlilweni sengathi ngumuntu ongaboniyo ukuthi kwenzakalani ngoba wayengakhali lokukhala kodwa izandla zivuthiswa ngumlilo,” kutsho uMnu Maphosa.
UMthunywa ukhulumisane njalo lomunye wabaphurofethi oziveze ngokuthi nguWilliam Stinta othe ondofa laba bafuna ukuyazilelwa ngoba befuna amandla amakhulu.
“Ondofa laba sizabazilela siyebalahla elwandle eSouth Africa lapho abavela khona, lapha asilawo amandla angabalahla,” kuchaza uMnu Sthinta. Intatheli izamile njalo ukukhulumisana lomphurofethi uMpala ibuza ngaloludaba kwehlula ngoba kuthiwa wahle wahanjiswa kuwafawafa omkhulu eTsholotsho ukuthi ayekwelatshwa ngoba kuthiwa engekela engafa njengoba engasakhulumi.
