uMthunywa
Ethel Ncube
BAKHALA ezimathonsi abazali beChipale Primary eBinga ngomphathisikolo ohuquluze imali yesikolo efika phose
i$15 000 esebenzisa isayinetsha yekhomithi endala, uMthunywa ukuzwile lokhu.
Kukhanya umphathisikolo lo ubeseleminyaka emithathu ethatha imali ebhukwini lebhanga lesikolo lesi ezitshayela esikolo nanko phela akwaziwa ukuthi yasebenzani esikolo.
Intatheli ixhumane lomunye umzali olomntwana ofunda esikolo lesi ozichaze ngokuthi nguMnumzana George Mudenda othe balinde abezemfundo ukuthi bazwe ngokuthi benzeni ngemali yesikolo eyadliwa ngumphathi.
“Ikhomithi yananzelela ukuba imali zesikolo azisebenzi ngendlela, kulezinye okungaziwayo ukuthi zingena ngaphi. Bacela umqondisi wezemfundo ukuthi angenele babone ukuthi kuhamba njani.
“Bathumela-ke bantu ukuthi bazochwayisiswa amabhuku okusetshenziswa kwemali kwatholakala ukuthi kulamabizo ekhomithi endala abesetshenziswa ngumphathi ukuthatha izimali bona bengazi,” kutsho uMnu Mudenda.
Uqhubekele phambili echaza ukuthi lokhe belinde impendulo kulabo ababuya bezodingisisa ngendaba le.
“Lokhe silinde impendulo kwabachwayisa ngamabhuku okusetshenziswa kwemali ababuyayo ukuzokhangela ukuthi kwenzakalani.
“Ukuthi imali zadliwa siyakwazi asifaniseli ngoba ukhona omunye wekhomithi eyaphumayo okwakusentshenziswa isayinetsha yakhe engakwazi.
“Wabizwa ngabakhangela ngezemali (auditors) ukuthi achasise ukuthi wayesayina imali isiyangaphi waveza ukuthi yena kakwazi lutho ngalokho,” kubika uMnu Mudenda.
Iphephandaba likazulu lixhumane lalowo okwakusentshenziswa isayinetsha yakhe engakwazi uMnumzana Sibanda owale ukuchaza igama lakhe esesabela abantwabakhe abafunda kulesisikolo ochaze ukuthi kuliqiniso ukuthi imali yadliwa ngebizo lakhe.
“Mina ngezwa sengibizwa kuthiwa ngilesandla ekuhuquluzweni kwemali ngumphathisikolo ngingazi lutho.
Ngaphuthuma ngayafika esikolo ngakhangela lapho ayefaka khona isayinetsha yami ifana xathu leyami bazwisisa ukuthi angazi lutho kulokho. Ngabuza umphathi ukuba kukhona lapho engabhala khona esiyathatha imali wazithulela.
“Esikufunayo thina yikuthi basiphe impendulo laye angasivali yena edlalisa imali zabantwabethu. Intuthuko ayikho lapha ngenxa yakhe. Sicela abezemfundo basincedise endabeni kamphathisikolo, isikhathi siyahamba laye eqhubeka eganga,” kubika uMnu Sibanda.
UMthunywa ukhulumisane lomqondisi wezemfundo uNkosazana Boitatelo Mnguni.
