uMthunywa
Cornelius Luphahla
ZIPHAKATHI kwelitshe lembokodo izakhamizi zesigabeni seNtalale, eGwanda ngenxa yomunye umongikazi wekilinika yeNtalale okubikwa sevule ibhizimusi yokuthengisa imithi yesibhedlela njalo abuye ancitshe izigulane imithi anike akhonza labo kuphela uMthunywa ukuzwile lokhu.
Umongikazi lo, uMercy Moyo ongu-Sister in-Charge eNtalale Clinic osolwa ngecala leli kubikwa ukhonza kwelinye ibandla elikule indawo (ibizo silalo) njalo uthengisela izakhamizi imithi yekilinika ethi uyithenga edolobheni leGwanda esitsho esenga ezimithiyo esenzela ukuvala izakhamizi.
UMthunywa uxhumane lesinye isakhamuzi sakule indawo uNkosazana Zakhele Mathema oveze ukuthi umongikazi lo uyahlukuluza izigulane azincitshe lemithi anike abazalwane bakhe.
“Umongikazi lo uthwalise nzima izigulane, uyazithethisa ethi kaziguli ziyazenzisa. Abazithweleyo labo uyabathethisa njalo sizwa kuthiwa wadla imali yokwakha izindlu zabo zokuhlala belindele ukubeletha.
“Ngikhuluma nje lami ngike ngagula ngibulawa zinyawo ngahamba ekilinika wafika wangithethisa ethi ngiyazenzisa ngingumuntu omdala. Yikho engihle ngakholwa khona ukuthi ugangile noma nje ngangihlala ngimuzwa ngendaba,” kutsho uNkszn Mathema.
“Okwangidanisayo yikuthi ngathi sokufanele ngiphiwe amaphilisi wathi kawakho nxa ngiwafuna kangikhiphe imali ayengithengela eGwanda kodwa ngingambuzi i-receipt. Ngamupha i$10 wasengena kweyinye iwofisi wabuya lawo wazongipha okuyikho okwangenza ngakholwa ukuthi ngempela uthengisa imithi yesibhedlela athi iwofisi yakhe yiGwanda,” kuveza uNkszn Mathema.
UMnumzana Israel Mkhosi ubikele intatheli ukuthi yena wafika ekilinika egula amaphilisi ekhona kodwa wawancitshwa omongikazi bathi kumele awaphiwe ngu-sister njalo aphiwa abazalwane.
“Mina ngahamba esibhedlela ngibulawa yisifuba ngathola amaphilisi ekhona kodwa omongikazi bathi ngeke bangiphe nxa usister engekho andubana bathi aphiwa abakhonza laye kuphela njalo nxa bengangipha engekho engabaxotshisa umsebenzi.
“Uthe ngemva kokubuya kwakhe wathi amaphilisi kawakho kangilethe imali nxa ngiwafuna. Ngenxa yokuthi ngangingelamali ngahamba ngingelatshwanga,” kuchaza uMnu Mkhosi.
UNkosazana Agnes Khumalo oyisakhamuzi sakule indawo uthe usister lo sowathenga imbuzi ezinengi ngemithi yesibhedlela sowaze waphiwa umuzi khonapha ngabazalwane bakhe thina sesize sisiya ekilinika ekhatshana.
“Umongikazi lo sowaphiwa indawo yokwakha umuzi ngabazalwane bakhe njengoba ebapha imithi lamaphilisi mahala. Kuthi kunjalo sowathenga imbuzi ezinengi kakhulu emzini wakhe. Mhlawumbe ezinye zakhona uzithenga ngemali ayithola ngokuthengisa amaphilisi.
“Okubuhlungu yikuthi sesize sihamba amakhilomitha angu-7 sisiyadinga usizo eChelesa Clinic okuyikho esiphiwa khona imithi mahala nguFather Moyo. Lokhu kuhle kusivezele sobala ukuthi kufanele siyiphiwe mahala,” kutsho uNkszn Khumalo.
Ebuzwa ngale indaba uSister Moyo uthe ngeke akhulume lentatheli njalo okwakathesi kakho eNtalale.
“Mina ngeke ngikhulume lawe ngoba kangivunyelwa ukuliphendula ngakho kungcono ufonele emawofisini amakhulu eGwanda. Okunye njalo kangikho eNtalale mina okwakathesi,” kutsho uSister Mercy.
UProvincial Medical Director uDokotela Rudo Chikonzora ebuzwa ngale indaba uthe kakayizwa ngakho basazoyihlolisa ukuze ilungisiswe.
“Indaba kaSister in Charge weNtalale othengisa imithi yekilinika ethi uyithengile asikayizwa ngakho sisazoyihlolisisa sibone ukuthi kuhamba njani ukuze siyilungisise,” kuphetha uDkt Chikonzora.
