uMthunywa
YiNtatheli kaMthunywa
ABADLALI benguqu kumathimu aku-Division One kumhlubulo ongezansi yelizwe balakho ukudlala bechelesile kulisizini nanko phela sekulenkezo yeJohn Landa Nkomo Super 8, ebiza i$5 000.
Inkezo le ihlawulelwa ngusomabhizimusi wakoBulawayo uRaj Modi njalo izadlalelwa ngamaqembu azafikisa ikhefu leligi ekunombolo eyisitshiya galombili kuyisiya phezulu.
Ukungena kukaModi kunguqu kaDivision One kuza ngesikhathi iligi le isiqede iminyaka idlalelwa mahala.
Amathimu ebesethwele nzima ekhonona ngokuthi angeke enelisa ukuphutsha isizini ngenxa yokudula kwendleko zokugcwalisisa imidlalo.
Ekhuluma lentatheli mhla wokwethula kwenkezo yeJohn Landa Nkomo Super 8, uElphas Mashava emele uModi uthe balethemba lokuthi i$5 000 ephoselwe kulinkezo izancedisa ukuthi amathimu akulumhlubulo welizwe adlale ekhululekile.
“Siyakubongela ukuthi umhlubulo ongezansi yelizwe usubonakala ukuthi ulethalenta elimangalisayo kwezemidlalo,” kutsho uMashava.
Uthe kungumbono wabo ukuthi inkezo entsha le izaqhutshwa minyaka yonke lokuthi izaphathisa amaqembu adonsa nzima ngenxa yokusilela kwemali.
“Njengoba kusegcekeni ukuthi inguqu yethu isiphakamile, kungumbono wethu ukuthi umncintiswano ozalethwa yinkezo le uzaphakamisa amathimu.”
Umgcinisihlalo weZifa kulumhlubulo welizwe uMusa Mandaza ubikele iphephandaba likazulu ukuthi ukuvezwa kwenkezo le kuyisitshengiselo sokuthi inguqu iyaphucuka kulindawo.
UMandaza ubike ukuthi isabelo sakhe siphakathi kokukhulumisana lamanye amabhizimusi angabayingxenye yabo ekuthuthukiseni inguqu.
“Sikhangelele ukuthi sibelengatsha ezithile esizakhulumisa lazo ukuze sithole usekelo lwemali. Amathimu akuligi yethu ephezulu kungenzeka aphiwe imvuzo.”
Kuzwakale njalo ukuba iZifa iyasuthiseka ngokukhula kwenguqu esabelweni lesi.
“Inhloso yethu yikuthi sithole usekelo lwemali, sinikeze labo abenza kuhle izicoco. Lokhu kuzaphathisa kakhulu ukuthi amathalenta abonakale kubadlali esilabo,” kutsho uMandaza.
“Konke sekulungile ukuthi siqhubeke ngokudlala iligi yethu kulisizini ka2016.”
