uMthunywa
YiNtatheli kaMthunywa
ZISELE zikhakhamele izihambi esilindweni samabhasi esidala eRenkini edolobheni lakoBulawayo kulandela ukubhubha kosane oluleminyaka emine.
Isehlakalo lesi esitshiye abantu esilindweni bedanile senzakala ngoMvulo wayonale iviki ekuseni lapho uAndile Gumede abhubhe ngesikhathi elindele ukugada ibhasi.
Omunye umfakazi othengisa esilindweni lesi uthe kube buhlungu ukubona isehlakalo esinje abantu bengasilindelanga.
“Umntwana lo ubehamba lonina eRenkini kukhanya bebefuna ukuya ekhaya kodwa ngokuswelakala kwenhlanhla waphelela khonapha, unina uhle wambeka phansi sebelindele i-ambulensi kanye lamapholisa.
UMthunywa uphinde wakhulumisana lonina womntwana yena othe umntwana ubegula ngakho bebelenhloso yokuhamba laye ekhaya.
“Umntanami lo ubegula ekhaya sasuka laye ezothola ukwelatshwa kodwa eMpilo bamkhiphe engakasili ngakho besesibuyela ekhaya ukuthi ayegulela khona kodwa kwehlule.
UMthunywa uphinde wakhulumisana lesikhulumi samapholisa uInspector Precious Simango othe udaba lokufa komntwana balwamukele.
“Samukele umbiko womntwana obhubhele eRenkini. Sizwe kuthiwa ubegula ngakho silufaka ngaphansi kokufa okwenzakeleyo nje,” kuphetha uInspector Simango.
