uMthunywa
USUSAN oleminyaka yokuzalwa engu-13 usengumama.
Kutsho ukuthi sekukunengi osekukhangelane laye okunjengokunakekela imuli, ukupheka, ukuwatsha lokunye okunengi kungelani lokuthi kumele ngabe usesikolo efunda labanye.
Umntwana oleminyaka yokuzalwa engu-13 ukhangelwelwe ukuba abesebangeni lakuqala ezifundweni zangaphezulu, kodwa kuSusan akubanga njalo ngoba umithiswe lijaha lakhe elileminyaka engu-18 elaphika isisu okwenza uSusan atshiye isikolo ekugiredi 7.
Chitungwiza Central Hospital
Intatheli zivakatshele uSusan esibhedlela seChitungwiza Central Hospital lapho aphiwe khona umbheda ngemva kokuqhaqheka lapho ayehlinzwe khona ngesikhathi ebeletha.
“Umntanami uselenyanga eyodwa ngimbelethile.
Ngabelethela lapha eChitungwiza njalo ngabeletha ngokuhlinzwa.
Ngibelethe umntwana oyinkazana.
“Ngahamba laye endlini lapho engihlala khona logogo.
Ngisendlini kunjalo, kulapho engabona khona ukuba lapho engihlinzwe khona sekuvulekile, ngasengiphelekezelwa ngugogo esibhedlela.
“Ngaphiwa umbheda, sengilenyanga ngilapha esibhedlela njalo sengingcono ngaphandle kokuthi ebusuku kubabuhlungu lapho engahlinzwa khona,” kuchaza umntwana lo ethwele usane lwakhe ezandleni.
USusan ubike ukuba abazali bakhe behlukana ngakho unina kasenelisanga ukumthathisa incwadi yokuzalwa.
“Ijaha lami lalike labotshwa ngenxa yokungimithisa kodwa laphuma, angazi ukuthi ngenxa yani.
“Mina angidlwengulwana kodwa savumelana ukuya emacansini.
Amapholisa ambopha kodwa asemkhipha ngoba ngingela ncwadi zokuzalwa, ngalokho ngahanjiswa kudokotela obala amazinyo ukuze kwazakale ukuthi ngileminyaka emingaki wasebika ukuba ngileminyaka engu-13.
Ngazalwa mhlaka-8 Ncwabakazi ngo 2008,” uyachaza.
USusan udinga usizo emphakathini olwempahla zomntwana, impahla zakhe, ukudla njalo kudingakala imithi lapha esibhedlela.
Abafisa ukusiza bangatshayela ugogo wakhe ucingo kunombolo ezithi: 077133480 loba ukuthintana lesikhulumi seChitungwiza Central Hospital uNkosazana Audrey Tasaranarwo kunombolo ezithi:0774120811.
UNkosazana Tasaranarwo uthi kulendaba ezinengi zabatsha abazithwalayo kodwa bahlangene lodubo ngesikhathi sokukhululeka.
“Khathesi silomntwana oleminyaka yokuzalwa engu-13 owamithiswayo lijaha elamtshiyayo.
Abazali bakhe behlukana, kala ncwadi zokuzalwa kodwa wahlolwa ngudokotela owabala amazinyo akhe kwatholakala ukuthi uleminyaka engu-13.
“Ngoba emncane, amathambo akhe awakaqini ukuthi enelise ukubeletha yedwa ngakho wahlinzwa.
“Esephumile esibhedlela, lapho ayehlinzwe khona kwaqhaqheka waphenduka njalo ukuthi sizomsiza,” utshonjalo.
UNkosazana Tasaranarwo uthi uSusan uyaphola ngosizo lwabalomusa abamnika impahla lokudla ngesikhathi esesibhedlela.
UHulumende wakuleli sowabeka umthetho othi amankazana ayabe eke azithwala abuyele esikolo.
IUnited Nations Population Fund (UNFPA)
IUnited Nations Population Fund (UNFPA) le UNICEF ithi amankazana amanenginengi asuka emulini ezihluphekayo asengozini yokwenda bengakakhuli okwenza bacine betshiya isikolo bahlale bedubeka impilo yabo yonke kunye labantwana abababelethayo.
