uMthunywa
Ethel Ncube
KULEMULI yeKhombo elokhu ihlulukelwe kubangelwa yikungasuthiseki kwayo ngendlela amapholisa aphatha ngayo udaba lokufa kwamalunga emuli yawo amahlanu ngemva kokugxotshwa yimota emi eceleni komgwaqo ngoMbimbitho kuwonalo umnyaka.
Imuli yakoNkomo kuVillage 6 khonale eKhombo lalamuhla lokhu izidla amathambo engqondo ngitsho langezigigaba ezenzakala ngelanga lomngcwabo wamalunga la.
Kubikwa ngalelolanga kwehla iyezi elimnyama kwafa abantu abayisikhombisa okugoqela phakathi kwabo ababili abayibo ababecele amalunga emuli le ukuthi babanuselele imota yabo.
UMthunywa uzwe ukuba ngelanga lomngcwabo wamalunga la kwavela ufudu owabonakala ehamba phezu kwebhokisi andubana kubonakale inyoka eyayingani iphanda eceleni kwelinye ifuna ukungena phakathi.
Phezu kwalokho kwathi kungcwatshwa elinye ilunga lemuli igodi laqala ukugobhoza amanzi agcwala phakathi kukanti ngemva komngcwabo kwaba lesinye isimanga nanko phela amagodi amabili abonakala ewela phakathi abantu bengakachitheki.
Iphephandaba likazulu livakatshele kuleyondawo lapho elikhulumisane lesinye isakhamuzi uMnumzana Mackenzie Nkomo ochaze ukuthi lokhe besamangele ukuthi abafana laba bathathwa yini.
“Ingozi ziyenzakala kodwa le sehluleka ukuyizwisisa ukuthi abantu bangatshaywa yimota njani beseceleni komgwaqo bafe bonke kungasali loyedwa ongachazela abadala ukuthi kwahamba njani.
“Mina okwangiqeda amandla yikuthi bathi sebezabekwa kwathutsha ufudu ehamba phezu kwebhokisi likamuyi kungaziwa lokuthi uvele ngaphi, sathi sisithi mehlo suka nango ezihambela akula owambonayo ukuthi waqonda ngaphi. Sazobona inyoka isifukula ngaphansi kwelinye ibhokisi,” kutsho uMnu Nkomo.
Intatheli ixhumane lomunye owayekhona emfeni uNkosazana Lungani Moyo laye oveze ukuthi lokhe etshe amathe ngokwenzakala emfeni yakoNkomo.
“Ngazibonela ngawami amehlo emfeni yakoNkomo ufudu luhamba lungagqize qhakala phezu kwelinye ibhokisi endlini kodwa kungakhanyi ukuthi luvele ngaphi njalo luyangaphi. Sithe sokuyiwa emangcwabeni ababili babekwa kuhle sibili kodwa amangcwaba abo ahle awela labantu bengakabuyeli emizini yabo.
“Kuthe sokubekwa omunye sathola igodi seligcwele amanzi phamu kodwa izulu lingani bawakhupha kwathatha isikhathi ukuthi aphele. Sadideka njengezakhamizi ukuthi kuhamba njani kusenzakala izimanga kodwa kasizange sithole impendulo,” kutsho uNkszn Moyo
Kucatshangelwa ukuba kulesakhamuzi esilesandla ekufeni kwamalunga emuli.
Intatheli ixhumane lelinye ilunga lemuli yakoNkomo, uNkosazana Betty Nkomo obike ukuba izimanga zenzakala emngcwabeni wabantwana bomfowabo.
“Mina ngangivele sengidideke ingqondo ukuthi abafana bafa bonke baphela sikhathi sinye njani. Mina lanxa ngingazange ngilubone ufudu kodwa ugogo walubona kanye lenyoka eyayifukula ngaphansi kwamabhokisi.
“Indaba le yaphelela emoyeni ukuthi siyilungisise njalo sabhoda ebantwini basibikela ukuthi abantwana badliwa ngesinye isakhamuzi.
“Satshelwa ukuthi siyetshaya amangcwaba abo sehluleka ngoba amasiko ethu kawasivumeli. Ufudu kuthiwa wayezokhangela ukuthi ngempela abafana laba bafile njalo umuntu owadla abantwabami wayekhona lasemfeni.
“Kuliqiniso ukuthi amangcwaba adilikela khonapho kuphela umsebenzi, lokho kwakutshengisa ukuthi omuyi laba kukhona abakusolayo ngokufa kwabo ngoba elinye igodi latholakala lingcwele amanzi kungelazulu.
“Mina ngibuhlungu ngalesisenzo kodwa owakwenzayo lokhe ephila ukhona lakhathesi. Sihlutshwa zimali ngabe kudala salungisa uzimu lwangena emulini yakhe,” kuphetha uNkszn Nkomo.
