uMthunywa
Buhlebenkosi Gaule
“NKOSI ngivalelwe entolongweni umnewethu ubelokhe ethumela ondofa bakhe ukuthi bangijikijele ngamatshe.
Bengingalali ngitsho nkosi, lalo ebengilaye ukuzwile lokhu.”
La bekungamazwi kaMaxen obemiswe phambi komthethwandaba esetheswa icala lokuthi umnewabo ungumthakathi.
Izelamani lezi uMaxen Siziba oleminyaka yokuzalwa engu-46 ohlala elokitshini leCowdray Park kanye loOtric
Siziba oleminyaka yokuzalwa engu-56 ohlala eNkulumane koBulawayo bamangalise inkundla yeWestern Commonage kuyonale iviki nanko phela uOtric ubophise umnewabo obesithi umthumela ondofa ukuthi bamhlukuluze.
Kubikwa nyakenye uMaxen wacela i-Protection Order ethi kafuni umnewabo, uOtric amthumezele imlayezo, amfonele loba ukuthi amvakatshele emzini wakhe ngoba egangile.
UOtric utshele inkundla ukuba umnewabo uMaxen wephule isivumelwano se-Protection Order.
Kubikwa mhlaka 9 Mbimbitho uMaxen wathumela umnewabo uOtric umlayezo ngocingo embuza ukuba uzamani kungani emthumela ondofa njalo uzamthola kuphela.
Umantshi uMnumzana Abednico Ndebele ebuza uMaxen ukuba kungani ehlukuluza umnewabo ngaloluhlobo, uthe kukhona obekuhlala kubahlupha emulini yakwabo ngakho wacela abadala bemuli ukuba bazobaxazululela lokho kodwa uOtric wayavimba lokho ethi akukho okubahluphayo.
Uthe isenzo lesi samthukuthelisa kakhulu yikho nje wamthumezela umlayezo.
Umantshi ubuze ogadijeli abaveze ukuthi kabazake bawezwe lawomatshe.
Umantshi uthe udlulisele phambili ukuthoniswa kwecala leli kumhlaka 11 Mabasa.
Umtshutshisi kulelicala bekunguMnumzana Mufaro Mageza.
