uMthunywa
YiNtatheli kaMthunywa
NGENYANGA ezayo akubizwa ozwayo kumjaho we-Old Mutual Nkulumane Fun Run onxusa bonke abalesifo sokugijima umango wamakhilomitha alitshumi kulelikolitshi.
Lo ngumjaho wokudlala okhankasela ukuthi izakhamizi zakoBulawayo zakhe imzimba eqinileyo ngokuthakazelela ukugijima.
Umjaho lo uqhutshwa minyaka yonke enzikini yamabhizimusi eNkulumane Complex, okuyisakhiwo senkampani yeOld Mutual.
Inkampani yeOld Mutual isekela umjaho lo ngemali engange-$8 500.
Mhlaka 4 Nhlangula kuzancentwa indlela ngeziqubu, abagijimayo bebanga ukutshaya intambo kuqala.
Kumbiko wayo wokunxusa abantu, inhlanganiso ebona ngenhlelo zomdlalo wokugijima koBulawayo eyeBulawayo Athletics Board (Bab) ithe labo abazizwa belentshukuntshu yokungena umango babuye ngobunengi babo.
Inhlanganiso yeBab ibika ukuthi ihlose ukuthola abantu abayinkulungwane lonyaka.
“Sifuna ukuthi kube labantu abanengi abazagijima kumjaho wethu weNkulumane Fun Run. Lapha sinxusa wonke umuntu. Umdlalo wokugijima kumele siwuthathele phezulu ngoba ukugijima kusiza ukuthi sibelemizimba eqinileyo.
“Ngakho-ke mhlaka 4 Nhlangula sizaqhuba umjaho njengeminyaka yonke. Kuzagijinywa amakhilomitha alitshumi kanye lalitshumi lanhlanu,” kutsho uMpofu ekhuluma loMthunywa ngoLwesibili.
UMpofu wengeze ngokuthi ukubhalisa ukugijima yimahala.
“Umjaho lo ugijinyelwa yizizalwane zonke zakuleli. Sonke sikhululekile ukuphatheka kuwo njalo ukubhalisa yimahala.
“Abafisa ukugijima ababhalise amabizo abo emawofisini eOld Mutual Centre koBulawayo, endaweni ezihleliweyo eGreen Zone phakathi kwedolobho, lase-Nkulumane Shopping Mall.”
Kukhangelelwe ukuthi kuncintise intshantshu ezijwayele ukungasileli kumijaho enjengale. Amathimu enhlanganiso zamapholisa, ogadijele lamasotsha zandise ukubuthanela imincintiswano enjengale.
