uMthunywa
Buhlebenkosi Gaule
ABAFUNDI abafundela ukuba ngomanjinela eyunivesithi yeNational University of Science and Technology (Nust) koBulawayo badibane kumncintiswano wokudinga amaphurojekithi alakho ukuphathisa ilizwe kungelandleko ezinengi.
Umncintiswano lo wenziwe ngoMvulo odlulileyo mhlaka 30 Nkwenkwezi eNust.
Kumncintiswano lo bekudingwa amaphurojekithi abafundi ababili abazakuyamela iyunivesithi yeNust kumincintiswano yabomanjinela eChinhoyi kuwonalo umnyaka.
Abafundi laba akade beyisificaminwe mibili abafuna ukuba ngomanjinela ababukise amaphurojekithi abo bagoqela uChengeto Zvavamwe, uDonald Mjonono abafundela iChemical Engineering, uElyvnah Matiure, Blessing Nyasha Mangirazi abenza iElectronics Engineering, uCleopatra Furusa lo Alice Matenga abe-Industrial and Manufacturing Engineering kanye loNothabo Hlabano loMorest Mzana abenza iTextile Technology.
Injongo yomncintiswano lo ibiyikuthi kukhethwe abafundi ababili abazakuyadibana labavela kwamanye amayunivesithi akuleli, eChinhoyi University of Technology umnyaka ungakapheli.
UMqondisi weNust Technopak uDokotela Eli Mtetwa ukhuthaze abafundi labanye akade bekhona kulowo umncintiswano ukuba amaphurojekithi akade esethulwa yilaba bafundi alakho ukuba ahlaziywe enziwe abengcono abesesetshenziswa kumankampani akoBulawayo kumbe elizweni lonke jikelele okuzaphathisa ukuthi kutholakale imisebenzi.
UMnumzana Wing Sibanda obengumhlonitshwa ongu-Unit Head wenkampani yeTelOne kuSouthern Region utshele abafundi laba ukuthi kumele kube ngumthwalo wabo ukuthi babone ukuba amaphurojekithi abo ayasetshenziswa ukuze kuthuthukiswe ilizwe.
Abafundi ababili ababe lamaphurojekithi akhethiweyo ukuyamela iyunivesithi yeNust nguDonald Mjonono loChengeto Zvavamwe.
Iphurojekithi kaMjonono ibidinga ezinye indlela zokuhlambulula amanzi okunatha ngalokhu esilakho kuleli kukanti ekaZvavamwe ibingeyokudinga indlela zokukhipha idayi kuzihlahla zama-gumtree.
