uMthunywa
Ethel Ncube
Abafundi besikolo seCowdray Secondary basele bebobotheka kulandela ukuvakatshelwa esikolo ngumlobi odumileyo koBulawayo ofike wabanika ingwalo zolimi lwesiNdebele azilobayo njalo abazifundayo.
Umlobi wezingwalo zesiNdebele uMihla Sitsha Tsheza uvakatshele lesisikolo kuyonale iviki lapho afike abalethuba lokuchazela abafundi ngogwalo lwakhe olusentshenziswa kuOrdinary Level.
Ekhuluma lentatheli uMihla Sitsha Tsheza uveze ukuba ubelethuba elihle labafundi lababalisi besikolo lesi.
“Ngithabile ukuba labafundi ngihambe esikolo lesi ngiyekhuluma ngebhuku lami abalifundayo elithi Wangenza mntanami.
“Ngifike ngabachazela ngamafitshane ukuba ibhuku lami likhuluma ngani njalongachaza kabanzi langenjongo zogwalo lwami ukuze bazwisise lula nxa sokubuye imibuzo kumihloliso yabo,” kubika uSitsha.
Uqhubekele phambili eveza ukuba uphathise lesisikolo ngokubapha ugwalo lwakhe.
“Ngithe sengiqedile ukubafundisa ngogwalo lwami ngabona kungcono ukuba ngibaphe izingwalo ezizabaphathisa njengoba imihloliso nje isisondele ukuze bazibalele benelise ukuphendula imibuzo yemihloliso baphumelele,” kuphetha uSitsha.
