uMthunywa
Mkhululi Ncube
UMHLABELELI wengoma zokholo uEverton Mlalazi usebuye wathola esinye isicoco sokuhlonipha umsebenzi wakhe libandla akhonza kulo, eleSeventh-day Adventist Church.
UMlalazi ozalwa eNyamendlovu kodwa ocula esesigodlweni eHarare usethole izicoco ezimbalwa selokhu wangena endimeni yezomculo.
Isicoco lesi siphiwe uMlalazi kweleBotswana yinhlanganganiso emela ibandla lamaSabatha kuhlangothi lwamazwe angezansi kwezwekazi le-Africa ethiwa yiSouthern African Indian Ocean Division (SID).
Uhlangothi lwabatsha kule inhlanganiso yilo oluqoqe ukuthi kubongwe uMlalazi kumkhosi obuseGaborone isigodlo selizwe leBotswana ensukwini ezisanda kwedlula.
“Ngithabe ngimanzi te ngokuphiwa isicoco lesi libandla engikhonza kilo. Lokhu kutsho okukhulu kimi nxa abazalwane bami kuzinga laphezulu besamukela umsebenzi engiwenzayo. Lokhu kutsho ukuthi umsebenzi wami uyamukeleka kakhulu.
“Ngibonga engisebenza labo abehlukeneyo kugoqela imuli yami ngokuba lami kuloluhambo. Ngipha isibongo njalo kumaqembu engicula lawo agoqela ele- The Vine, Worship Therapy Band, kunye labacindezela ingoma zami iRHI Media and Music Production,” kuphawula uMlalazi.
Umsekeli kamkhokheli wenhlanganiso ye-SID uDokotela Jongimpi Papu uthe kuqakathekile ukuthi ibandla libuke okuhle okwenziwa ngamalunga alo.
“Usuthole izicoco kwelakini kunye lakwamanye amazwe lanxa thina njengebandla lakho besingakakuphi isicoco. Yebo kambe singabe siphuzile ukukwenza lokhu kodwa-ke indla muva yinkosi, ibandla yilo elikukhulisileyo lahlakulela ithalenta lakho andubana umhlaba ukubone.
Kuhlangothi lwabatsha lwebandla, siyananzelela sibuye siyaqakathekise imisebenzi emihle eyenziwa ngobunono obukhulu,” kutsho uDkt Papu.
Uthe uMlalazi usecente indlela ezadonsela abanengi eNkosini esebenzisa ithalenta lakhe lokuhlabela.
