uMthunywa
Ncekwenhle Ncube
KULENINA elilokhe lizonde libhubhudla amagwebu kulandela ukuthi lixotshwe umsebenzi ngenxa yomkhwenyana olwe labantwabakhe emsebenzini walo.
Lindaba yenzakale mhlaka 13 Zibandlela lapho uOshad Sibanda ongumkhwenyana kaDorcas Sibanda afika wabhuqa uEsnath loSimeleni emsebenzini kanina eMguzani Farm ethi kungani bebefuna ukutshaya isithandwa sakhe esitsha.
Kubikwa isenzo leso asimphathanga kuhle uMnumzana Wayne umqhatshi kaNkosazana Sibanda wasebaxotsha ethi kumehlisa isithunzi ebantwini.
“UOshad wabuya watshaya uSimelani loEsnath ethi kungani bebefuna ukutshaya unkosikazi wakhe owamthatha ngemva kokwalana lomtanami uEsnath.
“Okungizwisa ubuhlungu yikuthi umfana lowu ubuye wazokulwa labantwana bami emsebenzini wami khathesi ikhiwa lami selingixotshe umsebenzi ngenxa yakhe. Uthi imali yokuthi ngiziphilise labantwana bami ngiyithathe ngaphi?” kulandisa uNkszn Sibanda.
Intatheli izwe ukuthi uPrisca Ndlovu umfazi omncane kaOshad wadlula ekhafulela umtakaEsnath owamzala ngesikhathi esathethwe nguOshad. Bathi bembuza ukuthi yindaba enze lokhu wathi umntwana lo uyamnyanyisa ngoba ufana lendwangu ububi bakhe.
Kuzwakale ukuthi ngemva kwenkulumo yakhe kwaba lokuxabana. Baphosa babambana ngezandla kodwa uPrisca wabaleka wayaceba kumkakhe.
Ngemva kwemizuzwana uOshad wabuya watshaya uSimeleni loEsnath ukuthi kungani bebefuna ukutshaya umfazi wakhe.
Ngesizatho salokhu, umnikazi wepulazi wafika waxotsha uNkszn Sibanda ngoba ethi abantwana bakhe lomkhwenyana abahloniphi okwenza isithunzi sakhe singabonwa ngumphakathi.
UNkosikazi Slethemba Khabo uthe labo bethuka sebesizwa kuthwa uMaSibanda usexotshiwe emsebenzini ngenxa yomkhwenyana.
“Abantu lokhe bethithibele ngesinqumo esithethwe ngumlungu. Umama lo bekungela okubi abekwenza. Kambe umfana lo angaze ebenze isihluku esingaka? Khathesi bazahlala ngaphi njengoba lendlu iyodwa kuphela?” kutsho uNkkz Khabo.
UNkosazana Docus Sibanda ubeqhatshwe eMguzani Farm lapho abesebenza ukuthelela izithelo lezihlahla ezincane.
Imizamo yokukhulumisana loOshad yehlule ngoba esezandleni zamapholisa okwamanje.
