uMthunywa
Ethel Ncube
KULENDODA yeZezani, eBeitbridge ekhuza umhlola nanko phela kusukela ekuqaleni kwawonalo umnyaka ayikaze yahlangana lomkayo emacansini ngoba uma kusiza leso sikhathi isitho sikamama simane sivaleke ngci kusale kusadwala nje.
Linsindabaphenduli yendaba isilethe usizi ekhaya lika Mnumzana Hardwork Nkomo osekubangele ukuthi abuyisele umkakhe uLivhu Ndlela ngakibo.
Lokhu kuvele emavikini ambalwa adlulileyo lapho uMnu Nkomo esehambise umkakhe kibo esiyakhonona ngokwenzakala ekamelweni labo lokulala ethi yena ngeke atshaye idwala yena wakhipha amalobolo.
Lakhathesi akula owenelisa ukuyicazulula lindaba ngoba labadala baphelelwe ngendaba enje enguvelakanci.
UMthunywa uxhumane lomunye welunga lemuli uNkosazana Noliwe Nkomo ochaze ukuba kulodaba olubuhlungu olunjalo abasazama ukululungisa.
“Umnewethu wabuya wazongibikela ngalinkinga ethi lokhe umnyaka waqalisa akaze angcinde uluju lwemvelo lomkakhe ngoba nxa ethi uyaqala ukuba enze umsebenzi isitho sikamakoti siyanyamalala kuvaleke ngci okukuthi ngeke wadlalwa umdlalo wasekamelweni lokulala,” kubika uNkszn Ndlela.
Ubuye waveza ukuba lokhu sekudale ukuba amalunga omdeni ahlale phansi acwayisise ukuthi kwehlula nga.
“Ngikhuluma nje abakomakoti sababiza sahlala phansi sazama ukubhoda kubosiyazi ukuthi kungabe kuhamba njani? Impendulo esazitholayo zinengi kakhulu.
“Abanye bathi ngamadlozi angasafuniyo ukuthi ahlale emendweni sokumele atshiye ayethwasiswa ukuze izinto zimhambele. Uhlupho olukhona yikuthi abantu laba sebeleminyaka bethathene lamuhla sokuvumbuluka udubo olungaxazululekiyo ngoba sokutheni,” kubika uNkszn Ndlela
Ekhuluma lentatheli uMnu Nkomo onguye obhekane lohlupho kumkakhe uchaze ukuba ukhathazekile emoyeni lasemzimbeni nje jikelele.
“Lokhu kungithena amadolo sengizame konke okusemandleni ami kodwa kuyehlula. Kusukela ekuqaliseni kwawonalo umnyaka kuyehlula ekamelweni lokulala. Nxa ngithi ngiyaqala umsebenzi ikhukhisi limane libaleke linyamalele siphupmputhe yonke indawo kodwa kuyabe sokuyi ngci.
“Ngicina ngisekela ngoba kungasizi lutho. Osiyazi bathi ngamadlozi abanye bathi ngamaloyo okuyikho angilandaba mina ngidinga usizo kodwa angilutholi. Sileminyaka leminyaka sisonke kungakaze kuvele loluhlupho. Kubuhlungu kakhulu ngoba umumo sungiphoqelela ukuba ngizame ukudinga umfazi wesibili. Umuzi lucansi phela,” kutsho uMnu Nkomo
Iphephandaba likazulu likhulumisane loNkszn Ndlela obike ukuba lokhu okwenzakala kuye ngeke akuvezele abamaphephandaba.
“Mina kuyangimangalisa ukuba ngubani oseze wafikisa lindaba emaphepheni. Akukho engingakutsho kini ngomuzi wami ebantwini kuzadlula konke angiphiki njalo kangali,” kuphetha uNkszn Ndlela.
